विराटनगर । मोरङको ग्रामथान गाउँपालिका-२ झोराहाटस्थित श्री सरस्वती माध्यमिक विद्यालयले ६७औं वार्षिकोत्सव मनाएको छ ।
शुक्रबार पूर्वराष्ट्रपति विद्यादेवी भण्डारीको प्रमुख आतिथ्यतामा विद्यालयले वार्षिकोत्सव तथा अभिभावक दिवस मनाएको हो ।
साे सामुदायिक विद्यालयले आफ्नै परिसरमा विविध कार्यक्रम गर्दै वार्षिकाेत्सव मनाएकाे हाे । कार्यक्रमको उद्घाटन पूर्वराष्ट्रपति भण्डारीले गरेकी थिइन् ।
कार्यक्रमलाई सम्बोधन गर्दै भण्डारीले शैक्षिक क्षेत्रको सुधारका लागि सबैको समन्वय आवश्यक रहेको बताइन् ।
विद्यालयका प्रधानाध्यापक अशाेककुमार लुइँटेलले विद्यालयकाे वार्षिक प्रतिवेदन प्रस्तुत गरेका थिए ।
वि.सं २०१४ सालमा स्थापित विद्यालयले २०४० देखि एसएलसी परीक्षा, २०५४ देखि प्लस टुसम्मको शिक्षा र २०६६ देखि प्राविधिक शिक्षा दिइँदै आइएको उनले सुनाए ।
यसैगरी, विद्यालयका ब्यवस्थापन समिति अध्यक्ष श्यामकुमार सरदारले शिक्षक, कर्मचारीसहित विद्यार्थी र अभिभावकहरूकाे सहयाेगले विद्यालयले दिनानुदिन प्रगति गर्दै गएकाे बताए ।
कार्यक्रममा पूर्वप्रधानाध्यापकहरू बलराम पाेखरेल, गाेविन्द भगत र तिलक सापकोटालाई सम्मान गरिएकाे थियाे भने पूर्वविद्यार्थीहरू वरिष्ठ फिजिसियन डा.दिनेश न्याैपाने, भक्तपुरका जिल्ला न्यायाधीश विश्वनाथ भट्टराई, उप-प्राध्यापक दुर्गाप्रसाद लुइँटेल र वाणिज्य बैंकका शाखा प्रबन्धक सञ्जीव चाैधरीलाई सम्मान गरिएकाे थियो ।
यस्तै, स्कुल निर्माणका लागि एक बिघा १९ कट्ठा जग्गा दान दिने स्वर्गीय सरस्वतादेवी निराैलाका पुत्रबधु सावित्रादेवी निराैलालाई पनि सम्मान गरिएकाे थियाे । उनीहरू सबैजनालाई पूर्व राष्ट्रपति भण्डारीले सम्मान गरिन् ।
साे अवसरमा विद्यालयमा अध्यनरत कक्षा ९ देखि १२ सम्मका विद्यार्थीहरूले कृषि, विज्ञान, गणित, नर्सिङ र प्राविधिक धारका वस्तुहरूकाे प्रदर्शनी गरेका थिए ।
उनीहरूले चारवटा स्टल राखेर स्थानीय खानाका परिकारका साथै अन्य विज्ञानजन्य सामग्री प्रदर्शनी गरेका थिए ।
साथै, विद्यार्थीहरूले सांगीतिक र साँस्कृतिक कार्यक्रममार्फत् उपस्थित अतिथि र अभिभावकहरूलाई मनोञ्जन दिलाएका थिए ।
सरस्वती माविमा बाल कक्षादेखि १२ सम्म दुई हजारभन्दा बढी विद्यार्थी अध्यनरत छन् । विद्यालयमा ५२ जना शिक्षक, कर्मचारी कार्यरत रहेका छन् ।
कार्यक्रममा प्रदेश सांसद भीम पराजुली, जयप्रकाश चाैधरी, ललिताकुमारी चौधरी, ग्रामथान गाउँपालिका अध्यक्ष नमोनारायण माझी र वडाध्यक्षहरूलगायतको उपस्थिति रहेको थियो ।
