विराटनगर । दाङको तुलसीपुर उपमहानगरपालिका-५ बिपी चोकमा रहेको एनएमबी बैंकको शाखा कार्यालयमा चोरी गर्न छिरेका एक युवक पक्राउ परेका छन् ।
मध्यरातमा एक्लै एनएमबी बैंकमा चोरी गर्न छिरेका तुलसीपुर-१८ दुधरासका २७ वर्षीय सन्तोष चौधरीलाई प्रहरीले पक्राउ गरेको हो ।
प्रहरीले हतौडा, छिना,पिलास, ह्याक्सो ब्लेडसहित उनलाई आइतबार बिहान २ बजे बैंकभित्रबाट पक्राउ गरेको हो ।
एक व्यक्ति मध्यरातमा बैंकमा प्रवेश गरेको भन्ने सूचनापश्चात इलाका प्रहरी कार्यालय तुलसीपुरबाट इन्स्पेक्टर विनोद खत्री नेतृत्वको टोली एनएमबी बैंकको कार्यालय रहेको स्थानमा पुगेको थियो ।
इन्स्पेक्टर खत्रीका अनुसार बैंकको ताला फोडेर भित्र प्रवेश गरिसकेको अवस्थामा ती व्यक्तिलाई पक्राउ गरिएको हो ।
शाखा कार्यालयमा लुटपाट प्रयास भएको सूचना एनएमबी बैंकको काठमाडौंस्थित केन्द्रीय कार्यालयबाट जिल्ला प्रहरी कार्यालय दाङलाई खबर भएको थियो ।
जिल्लाले इलाकालाई खबर गरेपछि इन्स्पेक्टर खत्री नेतृत्वको टोली परिचालन भएको थियो । चौधरीले प्रयोग गरेको रा ५ प ९७९ नम्बरको स्कुटर पनि प्रहरीले नियन्त्रणमा लिएको छ ।
इप्रका तुलसीपुरका प्रमुख डिएसपी अनिल ठकुरीका अनुसार उक्त बैंकमा राति सुरक्षा गार्ड राखिएको छैन । त्यही थाहा पाएर चोरी गर्न युवक गएको आँकलन छ । घटनाबारे थप अनुसन्धान भइरहेको उनले बताए ।
