विराटनगर । मोरङको बेलबारी नगरपालिका-४ बेतनामा मोटरसाइकलको ठक्करबाट वृद्धको मृत्यु भएको छ भने दुई जना घाइते भएका छन् ।
शनिबार दिउँसो १:२० बजेतिर पूर्व-पश्चिम लोकमार्गअन्तर्गत बेतनामा मोटरसाइकलले पैदलयात्री वृद्ध पुरुषलाई ठक्कर दिएको थियो ।
लक्ष्मिमार्गबाट बेलबारीतर्फ आउँदै गरेको प्र१-०२-०५२प ३९९२ नम्बरको मोटरसाइकलले पैदलयात्री स्थानीय अन्दाजी ८२ को मानबहादुर तामाङलाई ठक्कर दिँदा उनको टाउको, हात खुट्टामा चोट लागेको थियो ।
उनलाई उपचारको लागि कोशी अस्पताल विराटनगर ल्याएइको थियो । अस्पताल पुर्याउनासाथ अस्पतालका चिकित्सकले चेकजाँच गरी २ः२५ बजेतिर उनलाई मृत घोषणा गरेका हुन् ।
दुर्घटनामा मोटरसाइकल चालक धनपालथान गाउँपालिका-२ बस्ने २५ वर्षीय सुमन कटुवालको हात खुट्टामा चोट लागेको छ ।
यसैगरी, सोही मोटरसाइकलमा पछाडि सवार ३२ वर्षीय सन्जय पासवानको हात खुट्टामा सामान्य चोट लागेको छ ।
दुवै जनाको ग्रामथान गाउँपालिका-२ झोराहाटस्थित चौधरी मेडिकलमा उपचार भइरहेको छ ।
मोटरसाइकल भने इलाका प्रहरी कार्यालय बेलबारीले नियन्त्रणमा लिएको छ ।
