विराटनगर । दुई दिन विद्यालय नआएको भन्दै शिक्षकले निर्घात कुटपिट गर्दा १५ वर्षीय बालक घाइते भएका छन् ।
यो घटना दाङको राप्ती ग्यालेक्सी बोडिङ स्कुलको हो । लमही नगरपालिका–८ मा कार्यरत विज्ञान शिक्षक ३७ वर्षीय सुनील चौधरीको कुटपिटबाट कक्षा ९ का विद्यार्थी १५ वर्षीय निखिल खड्का घाइते भएका छन् ।
माघ ८ गते विहान विद्यालय पुगेका बालकलाई गेटमै रोकेर दुई दिन विद्यालय नआएको भन्दै निर्घात कुटपिट गर्दा विद्यार्थी खड्काको देब्रे कानको जाली फुटेको हो ।
हात र लाठीले प्रहार गर्दा खुट्टा र शरीरका अन्य भागमा पनि गम्भीर चोट लागेको पीडित बालकका बुबा गोविन्द खड्काले बताए ।
बालकको स्वास्थ्य उपचार माघ ८ गते खिम नरेश मेमोरियल बुढाथोकी इएनटी एण्ड डेन्टल केयर सेन्टर घोराहीमा र माघ ९ गते राप्ती स्वास्थ्य विज्ञान प्रतिष्ठानमा उपचार भएको छ ।
दुवै अस्पतालले बाललको देब्रे कानको जाली फुटेको र नशा समेत चुडिएको रिपोर्ट दिएका छन् ।
विद्यालयका प्रधानाध्यापक गणेश कोइरालाले नियतवश नहानिएको र सचेत गराउन खोज्दा घटना भएको उल्लेख गर्दै कानको उपचार विद्यालयले गर्ने बताए ।
उपचारका लागि घोराही आएका पीडित खड्काले घर फर्किएर प्रहरीमा उजुरी गर्ने जनाएका छन् ।
