विराटनगर । कोशी प्रदेशका सभामुख अम्बरबहादुर विष्टले पृथ्वी जयन्ती तथा राष्ट्रिय दिवसको शुभकामना दिएका छन् ।
सभामुख विष्टले शनिबार शुभकामनापत्र जारी गर्दै पृथ्वीनारायण शाहको ३०३ औं जन्म जयन्ती तथा राष्ट्रिय एकता दिवसको अवसरमा शुभकामना दिएका हुन् ।
‘नेपाल एकीकरण अभियानका अभिभावक एवम् राष्ट्रनायक पृथ्वीनारायणप्रति श्रद्धासुमन अर्पण गर्दै स्वदेश तथा विदेशमा रहनुभएका सम्पूर्ण नेपाली दाजुभाइ तथा दिदीवहिनीहरुमा हार्दिक शुभकामना व्यक्त गर्दछु,’ उनले जारी गरेको विज्ञप्तिमा भनिएको छ ।
छरिएर रहेका स-साना बाइसे चौबिसे राज्यहरूलाई एकीकरण गरी आधुनिक नेपाल राष्ट्रको निर्माण हुनु हाम्रो इतिहासमा विशिष्ट एवम् महत्वपूर्ण कदम मनिएको उनको भनाइ छ ।
गोरखाका तत्कालीन राजा पृथ्वीनारायण शाहले शुरु गरेको नेपाल निर्माणको अभियानलाई हाम्रा वीरपूर्खा र योद्धाहरूले गरेको योगदानस्वरूप नेपाललाई स्वतन्त्र, अविभाज्य, सार्वभौमसत्ता सम्पन्न, रूपमा स्थापना भएको सभामुख विष्टले उल्लेख गरेका छन् ।
पृथ्वीनारायण शाहले दिएका दिव्य उपदेश वर्तमान सन्दर्भमा पनि उत्तिकै मनन योग्य नै रहेको बताउँदै उनले आज नेपाल यहाँसम्म आइपुग्दा विगतमा हाम्रा पूर्वजहरूले गरेका त्याग र बलिदानप्रति हामीले उत्तिकै सम्मान गर्नु पर्ने बताएका छन् ।
