विराटनगर । मोरङको ग्रामथान गाउँपालिकाका नवनिर्वाचत अध्यक्ष नमोनारायण माझीले आफ्नो जानकारीबिना प्रमुख प्रशासकीय अधिकृतले पत्र पठाएको आरोप लगाएका छन् ।
ग्रामथान–२ मा माटो उत्खनन् भइरहेको विषयलाई लिएर प्रमुख प्रशासकीय अधिकृत रामराज पौडेलले प्रहरीलाई चिठ्ठी पठाएको बताएका हुन् ।
ग्रामथान–२ का विभिन्न नहर, सडकलगायत सार्वजनिकस्थलबाट अवै रूपमा माटो उत्खनन् भइरहेकाले रोकिदिन माग गर्दै प्रशासकीय अधिकृतले प्रहरी कार्यालय झोराहाटलाई पत्र पठाएका थिए ।
पुस ८ गते अधिकृत पौडेलले उक्त पत्र पठाएका थिए । ग्रामथान–१ र २ को सीमानामा भइरहेको उत्खननको पालिका उपाध्यक्ष गुणावतीदेवी थारू, वडाध्यक्ष र अरू जनप्रतिनिधिसमेतको टोलीले अनुगमन गरेको थियो ।
अनुमगनपछि पनि उत्खनन् कार्य नरोकिएका कारण अधिकृत पौडेलले प्रहरीलाई पत्राचार गरेका थिए ।
त्यसको तीन दिनपछि अर्थात् पुस ११ मा अध्यक्ष माझीले प्रहरीलाई पत्र किन लेखेको भन्दै कारण पेश गर्न प्रशासकीय अधिकृतलाई स्पष्टीकरण पत्र लेखेका थिए ।
आफू काठमाडौं गएका बेला सुटुक्क प्रहरीलाई पत्राचार गरेको आरोप अध्यक्ष माझीको छ ।
अध्यक्ष माझीले नहर बिगार्नेगरी खनेका कारण उक्त उत्खननको काम रोक्नुपर्न विषयमा आफू सकारात्मक रहेको बताए ।
तथापि, अनुमगनमै नगएका व्यक्तिले आफ्नो अनुपस्थितिमा प्रहरीलाई पत्राचार गर्नु र त्यसबारे आफूलाई प्रतिवेदन वा जानकारी पनि नदिएका कारण स्पष्टीकरण सोधिएको उल्लेख गरे ।
कर्मचारीलाई कारबाही गर्ने विषयमा भने स्पष्टीकरणको जबाफ आएपछि कमद चाल्ने उनको भनाइ छ । साथै, उनले उपाध्यक्षसँग आफ्नो कुनै टसल नरहेको बताउँदै मिलेर काम गर्नुपर्ने औंल्याए ।
अध्यक्ष माझीले माटो उत्खनन् अवैध नभएको खण्डमा त्यसले नियमतिता पाउने भए पनि नहर भत्काएर किसानलाई क्षति पुर्याउने काम गर्न नदिने पनि बताए ।
