कालिकोट । अत्यधिक चिसोका कारण जिल्लाको जनजीवन प्रभावित हुन थालेपछि खाँडाचक्र नगरपालिकामा रहेका विद्यालयका विद्यार्थीको अर्धवार्षिक परीक्षा लिन कठिनाइ भएको छ ।
चिसोले सरकारी विद्यालयको पठनपाठन प्रभावित भएको छ भने विद्यालयमा चलिरहेको अर्धवार्षिक परीक्षा घाम लागेको चौरमा सञ्चालन गर्नुपर्ने अवस्था आएको हो ।
जिल्लाको तापक्रम दुई डिग्रीमा झरेकाले विद्यालय आवत जावत र कक्षा कोठामा बस्न समेत कठिनाइ भइरहेको छ ।
कक्षाकोठामा बरफ जमेजस्तो भएको हुनाले बाहिर घाम लागेको फिल्डमा परीक्षा सञ्चालन गर्नु परेको खाँडाचक्र नगरपालिका–९ स्थित जनज्योति माविका प्रधानाध्यापक छत्रबहादुर शाहीले बताए ।
यस्तै, खाँडाचक्र नगरपालिका–५ स्थित चुलिमालिका माध्यमिक विद्यालयमा पनि भवनभित्र राखेर परीक्षा सञ्चालन गर्दा चिसोका कारण विद्यार्थीहरू बिरामी पर्ने डरले चौरमा परीक्षा सञ्चालन गर्न थालेको शिक्षक डिल्लीप्रसाद चौलागाईंले बताए ।
खाँडाचक्र नगरपालिकामा पुस ७ गतेबाट सञ्चालन भइरहेको परीक्षाका लागि विद्यार्थीहरू पोसाकमा आउनुपर्ने भएकाले कक्षाकोठामा राखेर परीक्षा सञ्चालन गर्दा बिरामी हुने सबैको सुझावपछि चौरमा बसालेर परीक्षा सञ्चालन गरिएको उनको भनाइ छ ।
तिलागुफा नगरपालिकाभित्रका सबै विद्यालयको पठनपाठन र परीक्षा चौरमा भइरहेको छ ।
मंसिर महिना लागेसँगै अत्यधिक चिसो हुन थालेपछि पठनपाठन पनि चौरमा गर्न थालिएको सत्यदेवि माध्यमिक विद्यालयका प्रधानाध्यापक सनम शाहीले उल्लेख गरे ।
