विराटनगर । मोरङ जहदा गाउँपालिकाकी २२ वर्षीय महिलालाई सामूहिक बलात्कार गरेको आशंकामा प्रहरीले तीन जनालाई पक्राउ गरेको छ ।
मोरङ प्रहरीबाट खटिएको टोलीले उनीहरूलाई मंगलबार नियन्त्रणमा लिएर घटनाको अनुसन्धान सुरु गरेको हो ।
पक्राउ पर्नेहरूमा कटहरी गाउँपालिका-२ का १९ वर्षीय मोहम्मद रमजान, सोही ठाउँका १९ वर्षीय सोनुकुमार साह र भारतको अररीया कुशाकट्टा स्थायी घर भएका १९ वर्षीय मोहम्मद गुल्जार रहेका छन् ।
उनीहरूलाई मंगलबार नै गिरफ्तार गरिएको हो । तथापि, मोरङ प्रहरीले पक्राउ परेका व्यक्तिको नाम आधिकारिक रूपमा सार्वजनिक गरेको छैन ।
मोरङ प्रहरी प्रवक्ता डिएसपी वेदप्रकाश जोशीले सोधपुछका लागि केही व्यक्तिलाई नियन्त्रणमा लिएको बताए ।
ती युवतीको गम्भीर अवस्थामा मंगलबार बिहान जहदा गाउँपालिका-३ बाँसघारीबाट उद्धार गरेर कोशी अस्पतालमा उपचार भइरहेको छ ।
हातखुट्टा बाँधेको र मुखमा सल कोचेको अवस्थामा अर्धचेत फेला परेकी उनलाई आफन्त र प्रहरीको सहयोगमा उपचार
गरिएको थियो ।
मंगलबार बिहान मर्निङवाक जान्छु भनेर घरबाट हिँडेकी उनी केही घण्टापछि बाँसघारीमा हातखुट्टा बाँधिएको र अर्धचेत अवस्थामा भेटिएकी थिइन् ।
उनको मुखका उनले ओढेको सल कोचिएको थियो ।
पराल लिन गएकी एक जना महिलाले देखेपछि प्रहरीसँग घटनाको जानकारी आएको थियो ।
प्रहरीले पुगेर बाँधेको डोरी खोलेर उपचारका लागि अस्पताल पठाएको थियो । अस्पतालमा मोरङ प्रहरी प्रमुख नारायण चिमरियासहितको टोलीले भेटेर ती महिलाबाट ‘क्लु’ लिएको थियो ।
त्यसैको आधारमा उनीहरू पक्राउ परेका हुन् ।
ती महिलाले लगाएको कपडा च्यातिएका छन् भने शरिरका केही भागमा निलडाम पनि छन् ।
उनीमाथि हातखुट्टा बाँधेर जबरजस्ती करणी भएको आशंका आफन्त र प्रहरीको छ ।
प्रहरीका अनुसार महिलालाई तीन जनाको समूहले सिटी सफारीमा राखी कटहरी-२ स्थित बाँस झ्याङमा लागेर हातखुट्टा बाँधेर जबरजस्ती करणी गरेको प्रारम्भिक अनुसन्धानका क्रममा खुलेको छ ।
तर मेडिकल परीक्षणपछि मात्रै सो विषयमा स्पष्ट खुल्ने भन्दै प्रहरीले अहिले थप के भएको हो भन्न सक्ने अवस्था नरहेको प्रहरीको भनाइ छ ।
कसैले नदेख्ने ठाउँमा लगेर हातखुट्टा बाँधेर मुखमा पट्टी लगाएपछि जर्बरजस्ती बलात्कार गरिएको हुनसक्ने उनकी दिदीको आशंका छ ।
