विराटनगर । मोरङको विराटनगर महानगरपालिका-११ बसपार्कमा गएराति तरबार प्रहारबाट एक युवा घाइते भएका छन् ।
गएराति १० बजेतिर स्थानीय रेगन कँडेलले तरबार प्रहार गर्दा विराटनगर-१२ का विजय कामत घाइते भएको मोरङ प्रहरीले जनाएको छ ।
सामान्य विवादमा कँडेलले तरबार प्रहार गरेपछि घाइते बनेका कामतको विराटनगरस्थित न्युरो अस्पतालमा उपचार भइरहेको छ । उनको बायाँ हातमा गहिरो चोट लागेको प्रहरीले जनाएको छ ।
राति नै पक्राउ परेका कँडेलमाथि ज्यान मार्ने उद्योगमा मोरङ अदालतमा बुधबार म्याद थप गरी अनुसन्धान थालेको छ ।
कँडेल विवादास्पद छविका व्यक्ति हुन् । यसअघि पनि मध्यरातमा विराटनगरको एक क्यासिनोमा जुवा खेलर बाहिरिने क्रममा झगडा हुँदा उनी घाइते भएका थिए ।
गत पुस २६ गते रत्ना होटलको ‘सम्राट’ नामक क्यासिनोबाट निस्किएर झगडा हुँदा कँडेल घाइते भएका थिए ।
