फाइल तस्बिर विराटनगर । मोरङको ग्रामथान गाउँपालिका-२ झोराहाटमा मोटरसाइकल दुर्घटना हुँदा बाबु-छोराको मृत्यु भएको छ ।
शनिबार अन्दाजी १२:१० बजेतिर झोराहाट चोकस्थित नहरको पुलको मोटरसाइकल ठक्कर खाएको थियो ।
घिनाघाट-विराटचोक सडक खण्डमा विराटनगरबाट विराटचोकतर्फ आउँदै गरेको प्रदेश१-०४-००२प १९०१ नम्बरको मोटरसाइकल आफै अनियन्त्रित भई नहरको पुलमा ठक्कर खाएको हो ।
उक्त दुर्घटनामा मोटरसाइकल चालक कटहरी गाउँपालिका-१ बस्ने अन्दाजी २२ वर्षीय आशिक मरिकको छातीमा चोट लागेको थियो ।
सोही मोटरसाइकलमा पछाडि सवार आशिकका बुबा अन्दाजी ४५ वर्षीय उमेश मरिकको चिउँडो र अनुहारमा चोट लागेको थियो ।
अवस्था गम्भीर रहेका दुवै घाइतेलाई उपचारको लागि विराट नर्सिङ होम अस्पताल, विराटनगर ल्याइएको थियो ।
तर, अस्पतालमा चिकित्सकले चेकजाँच गर्दा १२:४० बजेतिर दुवैलाई मृत घोषणा गरेका थिए । दुवै मृतकको लास सोही अस्पतालमा रहेको प्रहरीले जनाएको छ ।
दुर्घटनामा परेको मोटरसाइकल भने प्रहरी चौकी झोराहाटको नियन्त्रणमा छ ।
तीव्र गतिमा मोटरसाइकल कुदाएका कारण दुर्घटना भएको प्रहरीको प्रारम्भिक अनुसन्धानमा खुलेको छ ।
