विराटनगर । मोरङको पथरीशनिश्चरे नगरपालिका-६ का पूर्ववडाध्यक्ष जयबहादुर तामाङ यतिबेला राजनीतिसँगै व्यावसायिक खेतीमा लागेका छन् ।
तीन वर्षयता उनी राजनीतिक कार्यक्रम, सभा-समारोहमा भन्दा बढी आफ्नै खेतबारीमा भेटिन्छन् ।
खाद्य बालीभन्दा फलफूल खेतीमा दोब्बर आर्थिक लाभ हुने भएपछि उनले धान खेत मासेर सिउँडी प्रजातिको फल (ड्रयागन फ्रुट) लगाएका छन् ।
खाद्य बालीबाट तीन बिघा खेतमा हुने आम्दानी १० कट्ठाबाट भएपछि तामाङले ड्रयागन खेती अझ विस्तार गरेका छन् ।
पथरीशनिश्चरे ६ र सुनवर्सी १ का सात जना किसानले १५ विघा जग्गामा ड्रयागन खेती गरिरहेका छन् ।
उनले हाल अढाई बिघा धान खेत खेत मासेर ड्रयागन लगाएका छन् ।
गत असोजसम्ममा उनले २५ लाख रुपैयाँको फल बजार पठाएका थिए ।
गत वर्ष प्रतिकिलो ६ सय रुपैयाँमा बिक्री भएको ड्रयागन फ्रुट यो वर्ष तीन सय ५० रुपैयाँमा बिक्री भयो ।
उत्पादन बढेपछि मूल्य घट्यो, तर किसानलाई घाटा छैन । तामाङले विदेशबाट आउने फललाई विस्थापित गर्न उत्पादन अझै बढाउनुपर्ने बताए ।
तामाङले हालसम्म खेतीमा डेढ करोड लगानी गरिसकेका छन् ।
१० जनाले रोजगार पाइरहेको उनको पूर्वाञ्चल मल्टिपल एग्रिकल्चर प्रालि अहिले ड्रयागन फलको स्रोत केन्द्रका रूपमा विकसित भइरहेको छ ।
सुरुमा एउटा जातको मात्र बिरुवा लगाएका तामाङले हाल पाँच जात बिरुवा लगाएका छन् ।
जातअनुसार स्वाद पनि फरक छ । उपभोक्ताले रोजाइअनुसारको स्वादमा फल खान पाउँछन् ।
