दुहबी । सुनसरीको दुहबी नगरपालिका-५ मा रहेको सरस्वती माविको प्रांगणमा जीर्ण अवस्थामा रहेको सरस्वती माताको मन्दिरलाई स्थानान्तर गरी नयाँ मन्दिर निर्माणका लागि शिलान्यास गरिएको छ।
नगर प्रमुख वेदनारायण गच्छादारले बुधबार बिहान धार्मिक अनुष्ठानका साथ पूजा-अर्चना गरी मन्दिरको शिलान्यास गरेका हुन् ।
पूर्वविद्यार्थी समाज एसएलसी ब्याच २०६० का अध्यक्ष सुदर्शन भट्टराइको अध्यक्षता र दुहबी नगर प्रमुख गच्छादारको प्रमुख आतिथ्यतामा शिल्यान्यस कार्यक्रम आयोजना गरिएको थियो ।
जसमा पूर्वविद्यार्थीहरू शंकर थापा, जीवन थापा, ओमप्रकाश रौनियार, रमेश रौनियार, शंकर बस्नेत, पूर्वविद्यालय व्यवस्थापन समिति अध्यक्ष खेमनारायण चौधरी र विर्तमान विद्यालय व्यस्थापन समितिका अध्यक्ष ब्रह्मप्रकाश रौनियार, शिक्षकहरू दुखाराम खाँलगायतको उपस्थिति रहेको थियो।
पूर्वविद्यार्थी समाजका अध्यक्ष र सचिव सतिसकुमार चौधरी, दिवेश चौधरी, हेमनारायण माझीलगायतको अगुवाइमा उक्त मन्दिर बन्न लागेको हो ।
अनुमानित लागत १४ लाख ५६ हजार रहेको उक्त मन्दिर निर्माणका लागि पूर्वविद्यार्थीहरूले चन्दा संकलन गरी स्रोत जुटाएका छन् ।
शिलान्यास कार्यक्रमलाई सम्बोधन गर्दै नगरप्रमुख गच्छादारले सरस्वती माताको मन्दिर निर्माण गर्ने महान् हातहरूलाई धन्यवाद दिएका छन् ।
उनले सरस्वती माविमा बहुमुखी क्याम्पस सञ्चालनको प्रक्रिया तीव्र रूपमा अगाडि बढेको र केही प्रसंगगत कुरा बाँकी रहेको हुँदा आगामी शैक्षिक सत्रदेखि व्यवस्थापन र शिक्षा संकाय अध्यापन हुने बताए ।
साथै, रमपम फ्याक्ट्रीअगाडि पूर्वाञ्चल विश्वविद्यालयको आंगिक-प्राविधिक शिक्षालयसमेत सञ्चालनमा ल्याउने तयारी रहेको जनाए ।
प्रत्येक वर्ष १५ लाख बालबालिका विद्यालय भर्ना हुने तर एसइईसम्म पुग्दा पाँच लाख सहभागी देखिने अनि १० लाख बालबालिका खोइ ? भन्ने प्रश्न गर्दै यी बालबालिका खोज्न स्थानीय सरकार एक्लैले सम्भव नहुने बताए ।
यसमा तीनै तहका सरकारले सक्रियता देखाउन आवश्यक रहेको उनले जनाए ।
यसैगरी, उनले सरस्वती मन्दिर निर्माणमा नगरपालिकाको साथ रहने प्रतिबद्धता प्रकट गरे ।
आज अन्तर्रास्ट्रिय बालदिवस परेको अवसरमा बालबालिकाले आफ्नो पढाईलाई महत्व दिँदै भविष्यको राष्ट्र निर्माण अभियानमा सहभागी भएर विश्वको टपटेन धनी देश नेपाल बनाउन सकून् भन्ने उनले बालबालिकाप्रति शुभेक्षा प्रकट गरे ।
