विराटनगर । विद्युतीय सवारीसाधनमा आकर्षण बढिरहँदा चार्जिङ स्टेसन थपिने क्रम पनि उत्तिकै बढेको छ ।
कोशी प्रदेशको राजधानी विराटनगरमा अहिले पाँचवटा चार्जिङ स्टेसन छन् भने एउटा निर्माणाधीन अवस्थामा छ । हाल सञ्चालनमा रहेका पाँचमध्ये तीन वटा निजी क्षेत्रले चलाउँदै आएको छ ।
नेपाल विद्युत् प्राधिकरण, विराटनगर केन्द्रअन्तर्गत रहेर चलिरहेका यी चार्जिङ स्टेसनमध्ये एउटा प्राधिकरण स्वयमले चलाइरहेको छ भने अर्को एउटा प्रदेश सरकारमातहतमा छ ।
विराटनगर महानगरपालिका–१२ बसपार्कमा प्राधिकरणले १८० केभिए क्षमताको चार्जिङ स्टेसन चलाउँदै आएको छ ।
त्यसैगरी, विराटनगर–२ प्रशासन चोकमा कोशी प्रदेश खानेपानी, उर्जा तथा सिचाइँ मन्त्रालयले बनाएको सय केभिए क्षमताको स्टेसन पनि चालू अवस्थामा छ ।
तर, दुवै स्टेसनमा चार्जिङ पोर्ट बिग्रँदा चालकहरू मर्कामा छन् ।
निजी क्षेत्रबाट सञ्चालित स्टेसनमा महसुल बढी भएका कारण घण्टौं लाइन लागेर आफ्ना सवारी चार्ज गर्ने बाध्यता उनीहरूमा छ ।
लामो समयदेखि उक्त पोर्ट बिग्रिएको भए पनि प्राधिकरणले चासो नदिँदा आफूहरूलाई समस्या भएको उनीहरूको गुनासो छ ।
‘डेढदेखि दुई महिना भयो होला, चार्जिङ पोर्ट बिग्रिएको । तर पनि प्राधिकरणले चासो दिएको छैन,’ इभी चालक एमडी समिम भन्छन्, ‘एउटा मात्र पोर्टले काम गर्ने हुँदा हामीले प्यासेन्जर छोडेर लाइनमा बस्नुपर्ने बाध्यता छ ।’
यस्तै, चालक मोहम्मद नाइम विद्युतीय साधनहरू बढेर गए पनि चार्जिङ स्टेसनको संख्या नबढेको गुनासो गर्छन् ।
यसैगरी, अर्का चालक दिनेश चौधरी भने साथै प्राधिकरणमातहतमा रहेका स्टेसनको तुलनामा निजी क्षेत्रबाट सञ्चालित स्टेसनमा दोब्बर शुल्क तिर्नुपर्ने दुखेसो गर्छन् ।
यस्तैखाले गुनासो छ, चालक हरिओम साहको पनि । विद्युत् महसुलको रकममा एकरूपता नभएका कारण प्राधिकरणकै स्टेसनमा लाइन लाग्न विवश भएको उनको भनाइ छ ।
प्राधिकरणको विराटनगर वितरण केन्द्रअन्तर्गत आर्थिक वर्ष २०८०–८१ मा पाँच वटा विद्युतीय साधनका चार्जिङ स्टेसन छन् ।
बसपार्क र प्रशासन चोकबाहेक विराटनगरमा अरू तीन वटा चार्जिङ स्टेसन निजी क्षेत्रबाट सञ्चालन हुँदै आएका छन् भने एयरपोर्ट मोर्डमा एउटा स्टेसन निर्माणाधीन अवस्थामा छन् ।
विराटनगर–२ बरगाछीमा सुपरियर मोटरले चार्जिङ स्टेसन चलाउँदै आएको छ भने विराटनगर–३ कञ्चनबारीमा जिभाह इन्टरनेसनलले ७५ केभिए क्षमताको स्टेसन सञ्चालन गरिरहेको छ ।
विराटनगर–२ श्याम मन्दिरनजिक श्याम पावर हबले ७५ केभिए क्षमताको र विराटनगर–४ बरगाछीमा श्रिजा अटोमोबाइल्सले ४० केभिए क्षमताको चार्जिङ स्टेसन चलाउँदै आएका छन् ।
अहिले पिक, अफ पिक र अन्य समयमा भोल्टेजको हिसावले प्राधिकरणले महसुल तोकेको छ ।
प्राधिकरणको विद्युत् महसुल संकलन विनियामवली–२०७८ अनुसार चार्जिङ स्टेसनमा इभी चार्ज गर्दा प्रतियुनिट ८ रुपैयाँ ४० पैसासम्म तिर्नुपर्ने हुन्छ ।
तर, निजी क्षेत्रबाट सञ्चालित चार्जिङ स्टेसनमा प्रति युनिट १५ रुपैयाँसम्म महसुल लिने गरेका छन् । यसरी निजी चार्जिङ स्टेसनले आफूखुसी महँगो शुल्क लिइरहँदा सरोकारवाला निकायले अनगुमनसमेत गर्न सकेको छैन ।
यता, प्राधिकरणले भने चार्जिङ पोर्टमा आएको समस्याबारे आफूहरूलाई जानकारी नभएको बताएको छ । चाँडै नै उक्त पोर्ट बनाउने प्रतिबद्धता प्राधिकरणको छ ।
साथै, निजीहरूले चर्को शुल्क लिइरहेको गुनासो आए पनि अनुगमन गर्न नसकिएको विद्युत् प्राधिकरण वितरण केन्द्र विराटनगरका सूचना अधिकारी राजेश चौधरी स्वीकार्छन् ।
‘चार्जिङ पोर्ट बिग्रिएको विषय हामीमाझ आएको छैन,’ उनी भन्छन्, ‘अब सुन्यौं, चाँडै नै समाधान गर्छौं । महसुल भने समयका आधारमा भिन्नाभिन्नै हुन सक्छ । तर, केही गुनासा यहाँ पनि छ । अनुगमन गर्न सकिएको छैन । अनुगमनतिर पनि ध्यान दिन्छौं ।’
यसैगरी, विराटनगर–२ श्याम मन्दिरनजिक श्याम पावर हबका सञ्चालक कपिल बहेती आफूहरूले साढे १३ रुपैयाँ प्रतियुनिट महसुल लिएको बताउँछन् ।
विराटनगरकै अरू चार्जिङ स्टेसनको तुलनामा आफूहरूको शुल्क कम भएको सुनाउँदै उनी भन्छन्, ‘हामीले ठिक्क चार्ज शुल्क लिइरहेका छौं । प्राधिकरणको तुलनामा बढी देखिएको भए पनि अरू चार्जिङ स्टेसनभन्दा सस्तो छ, हाम्रोमा ।
