काठमाडौं । सत्तारूढ दल नेपाली कांग्रेसका सभापति शेरबहादुर देउवा प्रधानमन्त्री केपी शर्मा ओलीलाई भेट्न बालुवाटार पुगेका छन् ।
देउवा बालुवाटार आउने भएपछि प्रधानमन्त्री ओली पार्टी सचिवालयको बैठक छोट्याएर बालुवाटार फर्किएका थिए ।
सभापति देउवा आएपछि नेकपा एमालेका अध्यक्ष एवं प्रधानमन्त्री ओलीसँग भेटवार्ता सुरु भएको थियो ।
साँझ ७ बजे भेटवार्ताको समय तय भएको थियो । आइतबार बसेको केन्द्रीय सचिवालय बैठक छोट्याएर ओली देउवा भेट्न च्यासलबाट बेलैमा बालुवाटार फर्किएका थिए ।
छलफलमा एमालेबाट प्रधानमन्त्री ओलीका साथै उपाध्यक्ष विष्णु पौडेल, महासचिव शंकर पोखरेललगायत छन् ।
कांग्रेसका तर्फबाट सभापति देउवा, महामन्त्री गगन थापा, रमेश लेखकलगायत छन् ।
एमाले सचिवालय बैठक स्रोतका अनुसार देउवासँग सरकारकै नियमित कामकार्बाहीबार छलफल हुने प्रधानमन्त्री ओलीले जानकारी दिएका छन् ।
सहकारी ठगी प्रकरणमा पक्राउ परेका रास्वपा सभापति रवि लामिछानेबारे भने छलफल भए-नभएको भन्ने विषय बाहिर आएको छैन ।
तर, देउवासँग भेट्नुअघि भने ओलीले रास्वपाका नेता कार्यकर्ताले अराजनीतिक व्यवहार र संस्कार नदेखाएको टिप्पणी गरेका थिए ।
प्रधानमन्त्री ओलीले रास्वपाका नेता कार्यकर्ताले लामिछाने पक्राउ परेपछि सरकार र आफूविरुद्ध तमासा देखाएको भन्दै त्यस्तो तमासा राजनीतिक संस्कार नहुने बताए ।
संसद्को संसदीय छानबिन समितिको प्रतिवेदनअनुसार सरकारले कार्यान्वयन प्रक्रिया अघि बढाएको बताउँदै ओलीले लामिछाने दोषी भए-नभए अदालतले फैसला गर्ने बताए ।
तर, रास्वपा कार्यकर्ताहरूले यसरी हुलहुज्जत र गाली गरेर राजनीतिक संस्कार कायम नहुने उनको भनाइ छ ।
