विराटनगर । अर्जेन्टिनी फरवार्ड लियोनल मेसीको ह्याट्रिक गोलको सहायतामा अमेरिकन लिग सकरमा इन्टर मियामीले फराकिलो जित निकालेको छ ।
आइबार बिहान भएको खेलमा मेसीआबद्ध मियामीले घरेलु मैदानमा न्यु इंग्ल्यान्डमाथि ६-२ गोलान्तरको जित निकालेको हो ।
मियामीको जितमा कप्तान मेसीले ह्याट्रिक गोल गर्दा लुइस स्वारेजले दुई तथा बेन्जामिन क्रेमास्कीले एक गोल गरे । न्यु इंग्ल्यान्डका लुका लांगोनी र डिलेन बोरेरोले एक-एक गोल गरे ।
खेलको दोस्रो मिनेटमा लांगोनी र ३४औं मिनेटमा बोरेरोले गोल गरेपछि पाहुना टोलीले अग्रता बनाएको थियो ।
खेलको ४०औं र ४३औं मिनेटमा स्वारेजले गोल गरेपछि मियामी बराबरीमा फर्कियो । ५८औं मिनेटमा बेन्जामिनले गोल गरेर मियामीलाई अग्रता दिलाए ।
खेलको ५७औं मिनेटमा बेन्चबाट मैदान प्रवेश गरेका मेसीले १० मिनेटभित्रै ह्याट्रिक पूरा गरे । उनले खेलको ७९, ८१ र ८९ औं मिनेटमा लगातार गोल गरेका थिए ।
३७ वर्षीय मेसीले पाँच दिनभित्र राष्ट्र र क्लबका लागि ह्याट्रिक गोल गरे । यसअघि विश्वकपको दक्षिण अमेरिकी छनोटमा बोलिभियाविरुद्ध उनले ह्याट्रिक गोल गरेका थिए ।
