विराटनगर । मोरङको सुन्दरहरैंचा नगरपालिका–७ बस्ने दुई छोरीको हत्या गरी फरार रहेकी आमालाई पक्राउ गरी प्रहरीले बुधबार सार्वजनिक गरेको छ ।
जिल्ला प्रहरी कार्यालयद्वारा आज आयोजित पत्रकार सम्मेलनमा धनकुटा पाख्रीवास नगरपालिका–६ घर भएर सुन्दरहरैंचा–७ मालती टोल बस्ने २१ वर्षीया अस्मिता पौडेलाई पक्राउ गरी सार्वजनिक गरिएको हो ।
यही भदौ १४ गते बेलुकी पति अर्जुन कार्कीसँग सामान्य विवाद भएपछि अस्मिताले दुई छोरी तीन वर्षीया अर्पना र एक वर्षीया आइंकालाई केराको बगानमा लगी विष सेवन गराएर हत्या गरेको प्रहरीले जनाएको छ ।
दुई बालिकाको शव यही भदौ १५ गते प्रहरीले सुनदरहरैंचा-७ स्थित केरा बगानमा फेला पारेको थियो । प्रहरीले हत्याको आरोपित अस्मितालाई खोजतलासको क्रममा बुधबार झापाबाट पक्राउ गरेको हो ।
बिर्तामोड नगरपालिका–५ स्थित पूर्वपश्चिम राजमार्ग छेउ एभरेस्ट बैंकअगाडि हिँडिरहेको अवस्थामा फेला पारी पक्राउ गरी ल्याएको जिल्ला प्रहरी कार्यालय मोरङका प्रमुख प्रहरी उपरीक्षक नवराज कार्कीले जानकारी दिए ।
आरोपित अस्मितालाई सञ्चारकर्मीको सूचनाको आधारमा पक्राउ गर्न सफल भएको प्रहरी उपरीक्षक कार्कीले बताए ।
आरोपी अस्मिताले श्रीमानले आफूमाथि सधैँ कुटपिट गर्ने र मार्छु भन्ने गरेकाले रिसको झोकमा भदौ १४ साँझ १८ः३० बजे आफूले विष खाइ र छोरीलाई खुवाएकोमा छोरीहरूको मृत्यु भएको प्रहरीलाई दिएको बयानमा उल्लेख गरेकी छन् ।
जिल्ला अदालत मोरङबाट घटनाका सम्बन्धमा थप अनुसन्धान गर्न चार दिनको म्याद गरिएको प्रहरीले जनाएको छ ।
यसरी भएको थियो घटना :
अस्मिता धनकुटाको पाख्रिबास नगरपालिका–५ घर भइ सुन्दरहरैंचा–७ मा बस्दै आएका अर्जुन कार्कीकी पत्नी हुन् । अर्जुन २ छोरी र पत्नीसहित दिदी सीता रेग्मीको घरमा बस्दै आएका थिए । आइंका र अपर्णा नाबालिका छोरीहरू हुन् ।
अर्जुनले नयाँ घर निर्माण पनि गर्दै थिए । निर्माणाधीन घरमा पानी लगाउने विषयलाई लिएर अर्जुन र अस्मिताबीच विवाद सुरु भएको थियो । पतिसँगको विवादले रिसाएकी अस्मिता शुक्रबार साँझ कलिला नानीहरू लिएर बेपत्ता भएकी थिइन् ।
अस्मिताले ‘तेरा छोरी मारिदिइसकें, म पनि मर्छु’ भनेर पतिको मोबाइलमा म्यासेज पठाएकी थिइन् । अस्मिताले प्रयोग गर्ने मोबाइल नाबालिकाहरुको शवनजिकै फेला परेको थियो ।
उनले पहिले मेटासिस पिइन् र छोरीहरूलाई पनि पियाइन् । विष खुवाएर छोरीलाई मारेपछि रातभर विक्षिप्त भएर जंगलतिर भौतारिइन् ।
भोलिपल्ट बेलबारीको खोसार्नेबाट गाडी चढेर बिर्तामोड पुगिन् । बिर्तामोडमा पाँच दिनसम्म जंगलको छेउ र बस्तीनजिक भौतारिएर विक्षिप्त मानसिकतामा हिँडेको थिइन्, उनी ।
मंगलबार राति १ जना शंकास्पद महिलाले स्थानीयको घरमा बास माग्दै हिँडेको भनेर स्थानीय सञ्चारकर्मीले प्रहरीलाई जानकारी दिएको थियो ।
प्राप्त जानकारीकै आधारमा हुलिया विश्लेषण गर्दै खोजी गर्दा अस्मितालाई जीवितै फेला पार्न प्रहरी सफल भएको हो ।
प्रहरीका अनुसार अस्मिता केही मानसिक समस्यामा रहेजस्तो पनि देखिन्छ । अस्मिताले आफूले पनि विष सेवन गरेको बयान दिएकी छन् ।
उनका भनाइअनुसार पतिसँग बारम्बार झैझगडा र विवाद हुने गरेको थियो । बीपी कोइराला स्वास्थ्य विज्ञान प्रतिष्ठान धरानमा पोस्टमार्टमपछि दुवै नाबालिकाको शवको अन्त्येष्टि गरिसकिएको छ । बाबु अर्जुन उनीहरुको काजकिरियामा छन् ।
