विराटनगर । सुनसरीको धरान उपमहानगरपालिका-१५ श्यामचोकबाट प्रहरीले एक सय केजी गाँजासहित भारतीय नम्बर प्लेटको कार नियन्त्रणमा लिइएको छ ।
मंगलबार दिउँसो श्यामचोकबाट पानबारी जाने सेउतीपुल क्षेत्रबाट चाइनिज पेस्तोलबाट एक राउण्ड हवाईफायर गरी एक क्विन्टेल गाँजासहित कार नियन्त्रणमा लिएको प्रहरीले जनाएको छ ।
पानबारीतर्फ जाँदै गरेको भारतीय कार चेक जाँचका क्रममा प्रहरीलाई छलेर भाग्न खोज्दा हवाई फायर गरी कारसहित गाजा नियन्त्रणमा लिइएको जिल्ला प्रहरी कार्यालय सुनसरीका प्रहरी नायव उपरीक्षक नवीनकृष्ण भण्डारीले जानकारी दिए ।
प्रहरीले कारलाई रोक्न प्रयास गर्दा तीव्र गतिमा अघि बढेपछि प्रहरीले पछ्याउँदै जाँदा ३५ मिटर पर कार छाडी कारका चालक जंगलतर्फ भागेको प्रहरीले जनाएको छ ।
कार चेकजाँच गर्दा अवैध लागु औषधगाँजा प्लाष्टिकको पाँच वटा बोरामा बरामद गरेको जिल्ला प्रहरी कार्यालय सुनसरीले जनाएको छ ।
चालकले गाडी छोडेर भागेकाले तस्करहरूलाई पक्राउ गर्न नसकिएको प्रहरीले जनाएको छ । फरार रहेका कार चालकको खोजी भइरहेको पनि प्रहरी नायव उपरीक्षक भण्डारीले जानकारी दिए ।
