विराटनगर । कोशी प्रदेशसभा सदस्य तथा पूर्वमन्त्री बुद्धिकुमार राजभण्डारी जुवाखालबाट समातिएका छन् ।
पूर्वसामाजिक विकास मन्त्री राजभण्डारीसहित ११ जनालाई प्रहरीले जुवाको खालबाटै पक्राउ गरेको हो ।
पक्राउ पर्नेमा राजभण्डारीसहित, महेश किराँती, सोताङका पूर्व गाउँपालिका अध्यक्षसमेत रहेका बिरबहादुर राई, सोताङ गाउँपालिकाका कार्यपालिका सदस्य उत्तमकुमार राईलगायत रहेका छन् ।
काठमाडौं सिनामंगल एरियाको एक होटलबाट उनीहरूलाई जुवा तास खेलिरहेको अवस्थामा महानगरीय प्रहरी वृत्त गौशालाले पक्राउ गरेको हो ।
शनिबार दिउँसो पक्राउ परेका उनीहरूलाई प्रहरीले बयान लिएको छ भने अदालतमा उपस्थित गराउने तयारी गरेको बताइएको छ ।
