विराटनगर । जर्मनीका मिडफिल्डर टोनी क्रुस सन् २०२३–२४ को सिजनका लागि जर्मनीका प्लेयर अफ द इयर घोषित भएका छन् ।
जर्मन स्पोर्ट्स म्यागजिन किकरले आयोजना गर्ने अवार्डमा उनी सन् २०१८ मा पहिलोपल्ट प्लेयर अफ द इयर घोषित भएका थिए । ३४ वर्षीय क्रुसले दोस्रोपल्ट अवार्ड जितेका हुन् ।
गत सिजन रियल मड्रिडलाई च्याम्पियन्स लिग र स्पेनिस लिगमा दोहोरो जित दिलाएका क्रुसले गत महिना युरो कप विजेता स्पेनसँग पराजित भएपछि आफ्नो उत्कृष्ट खेल जीवनबाट सन्न्यास लिएका थिए ।
यस्तै, बायर लेभरकुजेनलाई बुन्डेसलिगाको उपाधि जिताए जाबी अलोन्सो भने कोच अफ द इयर बने ।
किकरका अनुसार क्रुसले २८५ मत प्राप्त गरेका थिए । लेभरकुजेन तथा जर्मनीका फ्लोरियन विर्ट्जले २४६ मत प्राप्त गरेका थिए भने स्विट्जरल्यान्डका मिडफिल्डर ग्रानिट जाकाले ६६ मत प्राप्त गरे ।
बायर्न म्युनिखको ११ वर्षको बुन्डेसलिगा दौड समाप्त गर्दै लेभरकुजेनले पहिलो उपाधि जितेको थियो ।
सिजनका सबै खेलमा लेभरकुजेन अपराजित रह्यो । अलोन्सोले पहिलोपल्ट कोच अफ द इयर घोषित भए । लेभरकुजेनले जर्मन कप पनि जितेको थियो ।
सन् २०२२ को अक्टोबरमा बुन्डेसलिगामा पुछारबाट दोस्रो स्थानमा रहेर लेभरकुजेनको प्रशिक्षकको जिम्मेवारी सम्हालेका ४२ वर्षीय अलोन्सोले ५०३ मत प्राप्त गर्दै स्टुटगार्टका प्रशिक्षक सेबास्टियन होएनी (४२) र हेडेनहाइमका प्रशिक्षक फ्रान्क श्मिट (५०) लाई पछि पारेका थिए ।
स्टुटगार्ट बुन्डेसलिगामा दोस्रो स्थानमा थियो भने हेडेनहाइमले आफ्नो पहिलो शीर्ष उडान सिजनमा आठौं स्थान हासिल गरेको थियो ।
