विराटनगर । मोरङको धनपालथान गाउँपालिकाले आगामी आर्थिक वर्ष २०८१/८२ को नीति तथा कार्यक्रम र बजेट प्रस्तुत गरिएको छ ।
सोमबार गाउँपालिकाको सभाहलमा आयोजित कार्यक्रममा पालिका अध्यक्ष जिवच्छप्रसाद गच्छदारले नीति तथा कार्यक्रम र उपाध्यक्ष नसिमा बानोले आय तथा व्ययको विवरण प्रस्तुत गरेका हुन् ।
कोशी प्रदेश सरकारका भौतिक पूर्वाधार विकास मन्त्री गणेश उप्रेतीको प्रमुख आतिथ्यता र प्रदेशसभा सदस्य गयानन्द मण्डलको विशिष्ट आतिथ्यतामा प्रस्तुत भएको नीति तथा कार्यक्रममा विद्यालयमा दिवाखाजादेखि लिएर गर्भवती महिलाका लागि नि:शुल्क एम्बुलेन्स सेवा प्रदान गरिने विषय समावेश छन् ।
‘गर्भवती महिलालाई सुत्केरी गराउन विराटनगर र रंगेलीसम्मका स्वास्थ्य संस्थामा जान-आउन एम्बुलेन्स सेवा नि:शुल्क रूपमै प्रदान गर्नेछौं,’ पालिका अध्यक्ष गच्छदारले भने, ‘स्वास्थ्य क्षेत्रतिरै भनेर हामीले पालिका उपाध्यक्ष कार्यक्रमअन्तर्गत यहाँकै बर्थिङ सेन्टरमा छोरा जन्मिए एक हजार र छोरी जन्मिए पाँछ हजार प्रोत्साहन रकम दिनेछौं ।’
यसैगरी, स्वास्थ्य नीतिमा पालिकाले विद्यालयमा अध्ययनरत विद्यार्थीका लागि दिवाखाजादेखि छात्रवृत्तिसम्मको नीति लिएको छ । बाल विकास केन्द्रदेखि कक्षा ५ सम्मका विद्यार्थीका लागि पौष्टिक दिवाखाजाको व्यवस्था मिलाउने अनि कक्षा १२ सम्मका विद्यार्थीलाई नि:शुल्क पाठ्यपुस्तक र छात्रवृत्ति उपलब्ध गराउने पालिकाको योजना छ ।
त्यस्तै, पालिका उपाध्यक्ष बानोले आगामी आर्थिक वर्षको अनुमानित ६४ करोड ३९ लाख ५५ हजारको बजेट प्रस्तुत गरिन् ।
वित्तीय समानीकरण अनुदान १२ करोड, संघीय सरकारको राजस्व बाँटफाँटबाट १० करोड र समपुरक अनुदान एक करोड, प्रदेश सरकारको वित्तीय समानीकरण अनुदान ७८ लाख, सवारीसाधन करबाट ४९ लाख, आन्तरिक आयस्रोतबाट दुई करोडलगायत गरी पालिकाले ६४ करोड ३९ लाख ५५ हजारको आय अनुमान गरिएको उपाध्यक्ष बानोले बताइन् ।
कार्यक्रमलाई सम्बोधन गर्दै मन्त्री उप्रेतीले स्थानीय सरकार जनताको सबैभन्दा नजिकको सरकार भएका कारण जनअपेक्षाअनुसार काम गर्न जनप्रतिनिधिलाई सुझाए ।
‘जनताले आफैं बनाएको सरकार हो यो, यसैले जनअपेक्षाविपरीत गएर कहिल्यै पनि काम गर्नुहुँदैन,’ उनले भने, ‘अनेकौं लडाइँ लडेर ल्याएको व्यवस्थाअनुरूप बनेको स्थानीय सरकारले जनताले अपेक्षा गरेअनुसारको काम गर्नुपर्छ ।’
