जनकपुर । जिल्ला अदालत धनुषाले कान्तिपुर मिडिया ग्रुपका अध्यक्ष कैलाश सिरोहियालाई थप तीन दिन हिरासतमा राख्न अनुमति दिएको छ ।
नागरिकता कसुर मुद्दामा पक्राउ परेका सिरोहियालाई शुक्रबार जिल्ला न्यायाधीश रोमाकान्त ज्ञवालीको इजलासले हिरासतमा राखेर अनुसन्धान गर्नका लागि थप तीन दिनको म्याद थप गरेको हो ।
जिल्ला प्रहरी कार्यालय धनुषाका प्रवक्ता रञ्जन अवाका अनुसार अध्यक्ष सिरोहियालाई जिल्ला सरकारी वकिलको कार्यालयमा बयानपछि पुनः म्याद थपका लागि अदालतमा पेस गरिएको थियो । वकिलको कार्यालयले पाँच दिनको म्याद थपको सिफारिस गरेको उनले बताए ।
अध्यक्ष सिरोहियाको पक्षमा वरिष्ठ अधिवक्ता शम्भु थापा, मधेश प्रदेशका पूर्व मुख्य न्यायाधीवक्ता दीपेन्द्र झा, वरिष्ठ अधिवक्ता सिताराम भट्टराई, शेरबहादुर केसी, रमण श्रेष्ठ, गोविन्द बन्दी, रमण कर्णलगायत सात जनाभन्दा बढी अधिवक्ताले बहस गरेका थिए ।
मधेस प्रदेशका पूर्वमुख्य न्यायाधिवक्तासमेत रहेका झाले सरकारले सिरोहियाविरुद्ध दुराशयपूर्ण रुपमा मुद्दा चलाएको बताए ।
एकै नम्बरका दुई नागरिकता दिनु राज्यको गल्ती भएको उनको भनाइ छ ।
सिरोहियालाई मंगलबार काठमाडौंको थापाथलीस्थित कार्यालयबाट उपत्यका अपराध अनुसन्धान कार्यालयको टोलीले पक्राउ गरी बुधबार धनुषा ल्याइएको थियो ।
उनलाई सोही दिन जिल्ला अदालतमा धनुषामा उपस्थित गराइएको थियो । अदालतले अनुसन्धानका लागि तीन दिन प्रहरी हिरासतमा राखेर अनुसन्धान गर्न अनुमति दिएको थियो ।
