विराटनगर । नेपाली सुगम-संगीतमा अजम्बरी एउटा नाम भक्तराज आचार्यको भौतिक शरीर अब हामीमाझ रहेन ।
‘हजार सपनाहरूको माया लागेर आउँछ’, ‘जति चोट दिन्छ्यौ देऊ मायालु’ जस्ता प्रेमिल र ‘जहाँ छन् बुद्धका आँखा’ जस्ता देशप्रेमी गीत एवम् ‘एक दिन मैले प्रभुसँग सोधें’ जस्ता भजनबाट जनमनमा बस्न सफल आचार्यको निधन भएको छ ।
श्वासप्रश्वासमा समस्या देखिएपछि उनलाई सोमबार साँझ मेडसिटी अस्पताल पुर्याइएको थियो । अस्पताल पुर्याएलगत्तै उनलाई चिकित्सकले मृत घोषणा गरेका थिए ।
८१ वर्षअघि १९९९ सालमा भारतको पश्चिम बंगालस्थित डुवर्समा जन्मिएका आचार्य लामो समययता बिरामी थिए ।
भजन शिरोमणिको उपनामले चिनिने उनी २०३० सालमा रेडियो नेपालको आधुनिक गायन प्रतियोगितामा प्रथम भएर व्यावसायिक गायनमा प्रवेश गरेका थिए ।
यद्यपि स्वरसम्राट नारायणगोपालका समकालीन गायक रहेका आचार्यको गायन यात्रा डेढ दशक मात्र रह्यो ।
२०४६ मंसिर १९ गते सांघातिक आक्रमणमा परेका आचार्यको क्यान्सरका कारण २०५० सालमा जिब्रो काट्नुपरेपछि गायन यात्रा रोकिएको थियो ।
त्यसयता उनी दूध मात्रै खाएर बाँचिरहेका थिए ।
उनका दुई छोराहरू सत्यराज र स्वरूपराज आचार्य पनि संगीत कर्ममा सक्रिय छन् ।
आचार्यको पार्थिव शरीर आज अस्पतालमै राखी भोलिमात्रै अन्त्येष्टि गर्ने परिवारको निर्णय रहेको अस्पतालले जनाएको छ ।
उनको जीवनमा आधारित चलचित्र ‘आचार्य’ बनेको छ । जसमा छोरा सत्यराजले उनको भूमिका निर्वाह गरेका छन् ।
