विराटनगर । विराटनगर महानगरपालिका-१० मेनरोडस्थित कान्तिपुर कलेजमा आइटी एक्स्पो तथा करिअर काउन्सिलिङ कार्यक्रम सुरु भएको छ ।
कम्प्युटर विज्ञान विषयमा अध्ययनरत विद्यार्थीहरूलाई लक्षित गरी सुरु भएको यो कार्यक्रम तीन दिनसम्म चल्ने छ ।
कलेजमा अध्ययरत व्यवस्थापन तथा विज्ञान संकायका कम्प्युटर विज्ञान विषय लिएर अध्ययन गर्ने करिब पाँच सयभन्दा बढी विद्यार्थीहरूले कार्यक्रमको प्रत्यक्ष रूपमा लाभ लिने कलेजका प्रिन्सिपल भुवन नेपालले बताए ।
कलेजमा अध्ययनरत करिब दुई हजार विद्यार्थीहरूले उच्च शिक्षाको साथ साथै व्यवहारिक तथा जीवनोपयोगी शिक्षासमेत लिने प्रिन्सिपल नेपालले जानकारी दिए ।
एक्स्पोमा विराटनगरका विभिन्न स्कुलमा कक्षा–९ र १० मा अध्ययनरत करिब एक हजार विद्यार्थीहरूले समेत अवलोकन गर्ने उनको अनुमान छ ।
इनोभेट नेपाल ग्रुपको सहकार्यमा सञ्चालित आइटी एक्सपोमा कलेजका सञ्चालकहरू तथा आइटी विज्ञहरू इन्जिनियर जयनाथ यादव, ई. देविलाल महतो, शंकर काफ्ले, ई. मञ्जयकुमार यादव साथै इनोभेट नेपाल ग्रुपका विकेक दाहाल विराटनगर इन्टरनेशनल कलेजका प्रमुख गोविन्द थापा, आइटी विज्ञहरू भुषण लुइँटेल, रोमन बुर्लाकोटी, पवन रेग्मीको उपस्थिति रहेको थियो ।
आइटी एक्सपोमा विद्यार्थीहरूले सफ्टवयेर निर्माण, एआई., इथिकल ह्याकिङ, साइवर सेक्युरेटी, मल्टिमिडिया, प्रोग्रामिङ आदिको विषयमा अवलोकन तथा ज्ञान आर्जन गर्ने प्रिन्सिपल नेपालले बताए ।
इन्जिनियर एसोसिएसन कोशी प्रदेश सभापति तथा कान्तिपुर कलेजका निर्देशक ई. जयनाथ यादवले आइटी विषयको महत्व साथै जीविकोपार्जन तथा समय सापेक्ष शिक्षाको लागि आइटी अपरिहार्य भएको बताए ।
को–र्डिनेटरद्वय रोशन राजवंशी र हिमाल वरालले कार्यक्रमको संयोजन गरेका थिए ।
कक्षा–११ र १२ सकिनेबित्तिकै किशोरावस्थामा नै विद्यार्थीहरु उच्च शिक्षाका लागि देश छोडेर बाहिर जाने भएकाले नेपालमै मेडिकल, इन्जिनियरिङ, आइटी र व्यवस्थापन आदि क्षेत्रमा पनि विद्यार्थीहरूको उज्जवल भविष्य रहेको प्रिन्सिपल नेपालले बताए ।
कान्तिपुर कलेजले दक्ष जनशक्ति निर्माणका लागि मेडिकल, इन्जिनियरिङ, आइटी, सिम्याट लगायतका तयारी कक्षाहरू गराउँदै आएको छ ।
उच्च शिक्षा प्रारम्भको आधार स्तम्भको रूपमा कोशी प्रदेशकै नमुना तथा उत्कृष्ट कलेजको रूपमा स्थापित भइसकेको कान्तिपुर कलेजमा विज्ञान, कम्प्युटर विज्ञान, व्यवस्थापन तथा होटेल व्यवस्थापन संकाय पढाई हुने गरेको छ ।
कक्षा–११ र १२ मात्र नभइ उच्च शिक्षाको लागि विद्यार्थीहरूलाई सहजीकरण गर्ने भएकाले एसइई दिँदै गरेका विद्यार्थीलाई सफलताको शुभकामना दिँदै एसइई नतिजापछि कान्तिपुरलाई निर्धक्क भएर रोज्न पनि प्रिन्सिपल नेपालले आग्रह गरे ।
