घोराही । दाङको घोराही उपमहानगरपालिकामा ड्युटीमा रहेकी महिला प्रहरीको गोली प्रहार गरी हत्या गरिएको छ ।
घोराही-१५ दामोदर चोकमा डिउटीमा रहेकी धनमाया थापालाई उनकै श्रीमान् यमबहादुर झाँक्री मगरले गोली प्रहार गरेर हत्या गरेका हुन् ।
थापा वडा प्रहरी कार्यालय घोराहीमा कार्यरत महिला प्रहरी जवान हुन् । उनका श्रीमान् भने नेपाल प्रहरीको नेपालगञ्ज तालिम केन्द्रमा कार्यरत छन् ।
प्रमुख जिल्ला अधिकारी रामबन्धु सुवेदीका अनुसार श्रीमानको गोली प्रहारबाट गम्भीर घाइते बनेकी थापाको उपचारका क्रममा घोराहीस्थित राप्ती स्वास्थ्य विज्ञान प्रतिष्ठानमा मृत्यु भएको हो ।
हत्यापछि फरार रहेका झाँक्री मगरलाई प्रहरीले देउखुरीको अर्जुनखोलाबाट पक्राउ गरेको थियो ।
