विराटनगर । मोरङको ग्रामथान गाउँपालिका–२ झोराहाटस्थित जनक मेमोरियल सेकेन्डरी बोर्डिङ स्कुलले श्रीपञ्चमी तथा सरस्वती पूजा मनाएको छ ।
विद्यालयमा सरस्वती माताको प्रतीमा स्थापना गरेर बुधबार स्कुलले पूजाअर्चना गर्दै मनाएको हो ।
हरेक वर्ष माघ शुक्ल पञ्चमीका दिन मनाइने श्रीपञ्चमीमाविद्याकी देवी सरस्वतीको पूजाआजा गरी मनाइएको स्कुलका प्रिन्सिपल सुनील भगतले जानकारी दिए ।
श्रीपञ्चमीसँगै विद्यालयमा बालबालिकालाई अक्षरआरम्भ पनि गराइएको र नयाँ शैक्षिक सत्र २०८१/८२ का लागि पनि भर्ना खुला गरिएको प्रिन्सिपल भगतले जानकारी दिए ।
विद्यालयमा स्थापना गरिएको सरस्वतीको प्रतीमामा विद्यार्थीहरूले पूजा–अर्चना गर्दै प्रसाद ग्रहण गरेका थिए ।
विद्यालयले आजै विभिन्न विधामा उत्कृष्ट विद्यार्थीलाई पुरस्कृत पनि गरेको थियो ।
त्यसबाहेक सरस्वती पूजाको अवसर पारेर जनक मेमोरियलले सांगीतिक कार्यक्रम पनि आयोजना गरेको थियो, जसमा विद्यार्थीहरूले सांस्कृतिक नृत्य देखाएका थिए ।
कार्यक्रममा विद्यालयका लेखा अधिकृत आलोक अधिकारी तथा शिक्षक–शिक्षिकाका अलावा अभिभावकहरूको उपस्थिति रहेको थियो ।
वसन्त ऋतु सुरु भएसँगै यस पर्व आउने भएकाले वसन्त पञ्चमीको नामले समेत आजको दिनलाई पुकार्ने गरिन्छ ।
सरस्वतीको पूजा गर्दा बुद्धि, विवेक बढ्ने जनविश्वास रहिआएको छ ।
