झापा । झापाको बुद्धशान्ति गाउँपालिकामा टिपरको ठक्करबाट मोटरसाइकल चालकको मृत्यु भएको छ ।
मृत्यु हुनेमा झापाको बुद्धशान्ति-३ बस्ने २३ वर्षीय रामकृष्ण पौडेलको मृत्यु भएको झापा प्रहरीले जनाएको छ ।
झापा प्रहरीका निमित्त प्रवक्ता प्रहरी निरीक्षक ढुण्डीराज गिरिका अनुसार शनिबार साँझ ६ः४५ बजेतिर बुद्धशान्ति-३ सात नम्बर चोकमा दुर्घटना भएको थियो ।
मेची राजमार्गअन्तर्गत चारआलीबाट बुधबारेतर्फ जाँदै गरेको मे ११ प ३१४९ नम्बरको मोटरसाइकल र विपरीत दिशाबाट आउँदै गरेको को १ ख ६४२८ नम्बरको टिपर एकआपसमा ठोक्किएका थिए ।
दुर्घटनामा दाहिने हात र छातीमा चोट लागेर घाइते भएका पौडेलको उपचारका क्रममा बिर्तामोडस्थित बिएन्डसी अस्पतालमा साँझ सवा ७ बजे मृत्यु भएको प्रहरीले जनाएको छ ।
यसैगरी, सोही मोटरसाइकलको पछाडि सवार सोही ठाउँ बस्ने वर्ष अन्दाजी २१ वर्षीया लीला गौतम भने गम्भीर घाइते भएकी छन् ।
शरीरको विभिन्न भागमा चोट लागेकी उनको बिएन्डसी अस्पतालमा उपचार भइरहेको छ ।
दुर्घटनापछि टिपर चालक फरार बनेका थिए ।
राति १०:४० बजेतिर भोजपुरको भोजपुर नगरपालिका-६ घर भई हाल भद्रपुर नगरपालिका-३ बस्दै आएका अन्दाजी ४० वर्षीय डम्बरबहादुर प्रधान आफैं ईप्रका धुलावारी झापाको सम्पर्कमा आएका थिए ।
उनलाई नियन्त्रणमा लिएर अनुसन्धान थालिएको प्रहरीले जनाएको छ । प्रहरीको प्रारम्भिक अनुसन्धानले मोटरसाइकल चालकको लापरबाहीका कारण दुर्घटना भएको देखाएको छ ।
