विराटनगर । कोशी प्रदेशको सामाजिक विकास मन्त्रालयले युवा नवउद्यमीलाई पुरस्कृत गर्ने भएको छ ।
शुक्रबार सूचना प्रकाशन गर्दै सामाजिक विकास मन्त्रालयअन्तर्गत शिक्षा, युवा तथा खेलकुद महाशाखाले नवउद्यमीलाई पुरस्कृत गर्नका लागि आह्वान मागेको हो ।
महाशाखा प्रमुख फणिन्द्र खत्रीका अनुसार नवउद्यमी युवा प्रतिभा प्रोत्साहनका लागि व्यवसायिक प्रोफायल पेस गर्न सूचना प्रकाशित गरिएको हो ।
आर्थिक वर्ष २०८०/८१ को राष्ट्रिय युवा परिषद (संघ सशर्त ) कार्यक्रमअन्तर्गत नवउद्यमी युवा प्रतिभा पहिचान तथा प्रोत्साहन कार्यक्रम सञ्चालन गर्न आँटिएको हो ।
कोशी प्रदेशभित्र उद्यम गरिरहेका १६ देखि ४० वर्षका योग्यता पूरा भएका नवउद्यमी युवाहरूले सूचना प्रकाशन भएको ३० दिनभित्र आवश्यक कागजातसहितको विस्तृत व्यवसायिक प्रोफायल पेस गर्न सक्ने छन् ।
उद्यम सुरु भएको एक वर्ष पूरा भएको र पाँच वर्ष ननाघेको हुनुपर्ने महाशाखा प्रमुख खत्रीको भनाइ छ ।
उनका अनुसार लघु तथा घरेलु उद्यम र कृषिमा आधारित उद्यमलाई प्रतियोगितामा सहभागिताका लागि प्राथमिकता दिइने छ ।
अन्तिम मूल्यांकन गरी उत्कृष्ट तीन युवा उद्यमी छनोट गरिने छ ।
मन्त्रालयले उत्कृष्ट पहिलो हुने युवालाई एक लाख रुपैयाँ, दोस्रो हुनेलाई ७५ हजार र तेस्रो स्थान हासिल गर्ने युवालाई ५० हजार रुपैयाँ नगद पुरस्कार तथा प्रमाणपत्र प्रदान गर्ने छ ।
यस्तै, मन्त्रालयले उत्कृष्ट तीन स्थान प्राप्त गर्ने युवाहरूलाई राष्ट्रिय युवा परिषद्ले आयोजना गर्ने राष्ट्रिय तहको नवउद्यमी युवा पहिचान तथा प्रोत्साहन कार्यक्रममा सहभागिताका लागि पठाउने छ ।
आवेदन पेस गर्न उद्यमसँग सम्बन्धित विस्तृत उद्यम प्रोफायल, उद्यमीको नागरिकताको प्रमाणपत्र प्रतिलिपि, उद्यम दर्ता र नवीकरणको प्रमाणपत्र प्रतिलिपी, पान दर्ता, लेखापरीक्षण प्रतिवेदन, स्थानीय तहको सिफारिस र उद्यमको कम्तिमा पाँच मिनेटको वर्णनात्मक भिडियो अनिवार्य चाहिने छ ।
थप विवरण सूचनामा हेर्नुहोस्:
