विराटनगर । मोरङ प्रहरीले मोटरसाइकल चोरीमा संलग्न रहेका भारतीय नागरिकलाई पक्राउ गरेको छ ।
पक्राउ पर्नेमा भारतको भारतको अररिया जिल्लाको फारवेशगन्ज थाना, रंघा मझुवा ग्राम पञ्चायत-११ का ३५ वर्षीय सिकन्दर मण्डल रहेका छन् ।
मोरङ प्रहरी प्रवक्ता प्रहरी नायब उपरीक्षक रन्जन दाहालका अनुसार उनलाई बिहीबार पक्राउ गरिएको हो ।
विराटनगर महानगरपालिका क्षेत्रबाट भइरहेको शृङ्खलाबद्ध मोटरसाइकल चोरीमा संलग्न रहेको आरोपमा उनलाई पक्राउ गरिएको डिसपी दाहालले जनाए ।
विगत केही समयदेखि मोटरसाइकल चोरीका घटनाहरू बढेका थिए । यसै सन्दर्भमा मोरङ प्रहरीबाट खटिएको विशेष अनुसन्धान टोलीले चोरी गर्दाको समयमा संकलित सिसिटिभी फुटेजका आधारमा उनलाई समातेको हो ।
मण्डललाई पक्राउ गरी प्रारम्भिक अनुसन्धानका क्रममा उनले चोरी गरी नम्बर प्लेट फालेर भारततर्फ लैजाने उद्देश्यले विराटनगर-१४ मा लुकाएर राखिएको तीन थान मोटरसाइकल बरामद भएको थियो ।
बरामद नभएका तीनवटै मोटरसाइकलका धनी प्रहरीको सम्पर्कमा पुगेका छन् ।
नेपालको सीमा क्षेत्रबाट संगठित रूपमा गिरोह परिचालन गरेर मोटरसाइकल चोरी गर्ने धन्दामा उनको संलग्नता देखिएको डिएसपी दाहालको भनाइ छ ।
प्रहरीका अनुसार मण्डल गिरोहका नाइके हुन् ।
मण्डल र उनको समूहले चोरी गरिसकेपछि मोटरसाइकलको नम्बर प्लेट फालेर भारततर्फ लैजाने गरेको पाइएको छ ।
मण्डलले अरू तीनवटा मोटरसाइकल चोरी गर्दै गरेको दृश्य सिसी क्यामेरामा कैद भए पनि ती मोटरसाइकल प्रहरीले बरामद गरिसकेको छैन ।
मण्डलविरुद्ध चोरी मुद्दा चलाउन बिहीबार अदालतबाट म्याद थप गरेर अनुसन्धान तीव्र बनाइएको डिएसपी दाहालले जानकारी दिए ।
