विराटनगर । देश र जनताको हित र अधिकारका लागि जीवन त्याग गरेका सहिदप्रति सम्मान गर्दै मंगलबार देशभर सहिद दिवस मनाइँदै छ ।
नेपाली जनतालाई सार्वभौमसत्ता सम्पन्न नागरिक बनाउन जहानिया राणा शासन, निरङ्कुश पञ्चायती व्यवस्था तथा तानाशाही राजतन्त्रविरुद्ध प्रजातान्त्रिक क्रान्ति एवम् लोकतान्त्रिक जनआन्दोलनहरूमा आफ्नो जीवनको आहुती गरेका वीर सपूतहरूको सम्झनामा प्रत्येक वर्ष सहिद दिवस मनाइँदै आएको छ ।
प्रत्येक वर्ष माघ १६ गते मनाइने सहिद दिवस प्रजातन्त्र स्थापना एवं पुनःस्थापना तथा विभिन्न कालखण्डका स्वतन्त्रताका लागि जीवन आहुति दिने सहिदको सम्झनामा विविध कार्यक्रम गरी मनाउने गरिएको छ ।
वीर सहिद शुक्रराज शास्त्री, धर्मभक्त माथेमा, दशरथ चन्द र गंगालाल श्रेष्ठको संघर्षमय जीवन र बलिदानको गाथा र प्रजातान्त्रिक आन्दोलनका अरू योद्धाहरूको योगदानमा सहिद दिवस मनाइएको हो ।
निरङ्कुश जहानियाँ राणा शासनविरुद्ध आफ्नो ज्यानको बलिदान गरेका वीर सहिदको स्मरणमा विभिन्न गैरसरकारी संघसंस्थाको पहलमा हरेक वर्ष माघ १० देखि १६ गतेसम्म ‘शहीद सप्ताह’ पनि मनाइँदै आएको छ ।
विभिन्न समयमा भएका आन्दोलनमा होमिएर राष्ट्रका लागि वीरगति प्राप्त गरेका सहिदको साहस र त्यागको पनि लेखाजोखा र उच्च मूल्यांकन गर्दै माघ १६ लाई शहीद दिवसका रूपमा मनाइएको हो ।
स्वतन्त्रताको माग गर्दा विसं १९९७ मा शहीद शुक्रराज शास्त्रीलाई माघ १० गते काठमाडौँको टेकुस्थित पचलीमा, माघ १३ गते धर्मभक्त माथेमालाई सिफलमा र गंगालाल श्रेष्ठ एवं दशरथ चन्दलाई माघ १५ गते शोभाभगवतीमा राणा शासकले मृत्युदण्ड दिइएको थियो ।
आज छैन बिदा
सरकारले यस वर्ष सहिद दिवसको दिन बिदा नदिने भएको छ भने अर्को वर्ष २०८१ को सहिद दिवसमा भने बिदा दिने भएको छ ।
सहिद दिवसको दिन मंगलबार सरकारले बिदा नदिएको गृह मन्त्रालयका प्रवक्ता नारायण प्रसाद भट्टराइले प्रस्ट पारेका छन् ।
२०८१को सहिद दिवसमा भने बिदा दिने निर्णय भएको उनले बताए ।
सरकारले २०८१ को लागि थप दुई दिन बिदा दिने निर्णय गरेको छ ।
अघिल्लो महिना बसेको मन्त्रिपरिषद् बैठकले २०८१सालमा माघ १६ र रामनवमीको दिनमा पनि सार्वजनिक बिदा दिने निर्णय गरेको छ ।
योसँगै सरकारले वि.सं २०८१मा दिइने सार्वजनिक बिदा तथा कार्यालय समय निर्धारण गरेको छ ।
२०७७ मा राजपत्रमा प्रकाशित गरिएको सूचनामा २०७८सालको लागि घोषणा गरिएको सार्वजनिक बिदाको सूचिमा सहिद दिवस र रामनवमीको दिन बिदा दिने परम्परा हटाइएको थियो ।
