विराटनगर । कोसी प्रदेश सरकारले मे २९ अर्थात् जेठ १६ गते सगरमाथा दिवस मनाउने भएको छ ।
आइतबार बसेको प्रदेश मन्त्रिपरिषद् बैठकले यस्तो निर्णय गरेको पर्यटन, वन तथा वातावरण मन्त्री गणेश उप्रेती ‘सुशील’ ले जानकारी दिए ।
कोसी प्रदेशमा विश्वका सर्वोच्च शिखर सगरमाथा रहेकोले मे २९ तारेखका दिन सगरमाथा दिवस मनाउने निर्णय भएको मन्त्री उप्रेतीले बताएका छन् ।
सन् १९५३ को मे २९ तारिखमा एडमन्ड हिलारी र तेन्जिङ नोर्गे शेर्पाले सगरमाथा हिमालको सफल आरोहण गरेका थिए ।
त्यसैको सम्झनास्वरूप यो दिवस मनाउने तयारी गरिएको मन्त्री उप्रेतीले जानकारी दिए ।
मन्त्री उप्रेतीका अनुसार सगरमाथा दिवसको अवसरमा प्रदेश सरकारले समिटर समिटसमेत गर्ने भएको छ।
प्रदेशस्तरीय अनुगमन तथा मूल्यांकन दिग्दर्शन २०८० स्वीकृत गर्नुका साथै प्रदेश योजना आयोगबाट अध्यावधिक प्रदेश पार्श्वचित्र स्वीकृत गरी सार्वजनिक गर्ने निर्णय भएको मन्त्री उप्रेतीको भनाइ छ ।
यसैगरी, धनकुटाको धनकुटा नगरपालिका र मेक्सिकोको सिताकुयरो नगरबीच भगिनी सम्बन्ध कायम गर्न कोसी प्रदेश सरकारले स्वीकृति प्रदान गर्न सिफारिस गर्ने निर्णय गरेको उनले बताए ।
साथै, मन्त्रिपरिषद्को आजको बैठकले प्रदेश लगानी प्राधिकरणको प्रमुख कार्यकारी निर्देशक सरोज कोइरालालाई थप एक कार्यकालका लागि पुनः नियुक्ति गर्ने निर्णय गरेको छ ।
