विराटनगर । उच्च शिक्षालय तथा माध्यमिक विद्यालय संघ, नेपाल मोरङ (हिसान) ले बुधबारदेखि खेलकुद प्रतियोगिता गर्दै छ ।
‘हिसान स्पोर्ट्स मिट’ नाम दिइएको उक्त प्रतियोगिता बुधबार (भोलिदेखि) विराटनगरमा हुनेछ ।
हिसान मोरङले मंगलबार विराटनगरमा पत्रकार सम्मेलन गर्दै १२औं संस्करणको उक्त प्रतियोगिता गर्न आँटेको जानकारी दिएको हो ।
हिसान मोरङका अध्यक्ष अमित ढकालका अनुसार ‘हिसान मोरङको मूल मन्त्र, शिक्षा र खेलकुद बलियो संयन्त्र’ भन्ने नाराका साथ आयोजना हुने उक्त प्रतियोगिता माघ १६ गतेसम्म चल्ने छ ।
हिसानले २०६५ सालदेखि निरन्तर रूपमा खेलकुदका कार्यक्रम आयोजना गर्दै आएको छ । यसमा हिसानसँग आबद्ध कलेजहरूले मात्रै भाग लिन पाउने छन् ।
यस पटकदेखि स्पोर्ट्स मिटमा छात्रा फुटबल र कवड्डी प्रतियोगिता पनि गराइँदै छ ।
फुटबल (छात्र–छात्रा), क्रिकेट (छात्र), बास्केटबल (छात्र), कबड्डी (छात्र) भलिबल (छात्र–छात्रा), टेबल टेनिस सिंगल र डबल्स (छात्र–छात्रा), एथलेक्टिसका खेलहरू हुनेछन् ।
प्रतियोगितामा विभिन्न खेलमा २९ वटा कलेजहरूका एक हजार २ सय बढी विद्यार्थीहरूले सहभागी हुने बताइएको छ ।
आयोजकको तर्फबाट विजेता तथा उप विजेता खेलाडीहरूले ट्रफी, मेडल प्राप्त गर्ने छन् भने खेलाडीहरूले उत्कृष्ट खेल प्रदर्शन गरी विजेता भए कलेजहरूले आन्तरिक रूपमा छात्रवृत्ति दिने घोषणा गरेका छन् ।
