पक्राउ परेका सुवेदी र राई संखुवासभा । संखुवासभा प्रहरीले दुई जना फरार प्रतिवादीलाई पक्राउ गरेको छ ।
पक्राउ पर्नेमा संखुवासभाको सिलिचोङ गाउँपालिका–२ का ५८ वर्षीय बद्रीकुमार राई र संखुवासभाकै मादी नगरपालिका–४ का २० वर्षीय अशेष भनिने असिम सुवेदी रहेका छन् ।
ललितपुर महानगरपालिका–२६ सुनाकोटीमा बस्दै आएका राई वैदेशिक रोजगार ठगी मुद्दाका फरार प्रतिवादी हुन् ।
राईलाई ललितपुरको प्रहरी बृत सातदोबाटोसँग समन्वय गरेर यही माघ ७ गते साँझ ललितपुर–१४ चापागाउँबाट पक्राउ गरिएको संखुवासभाका प्रहरी नायब उपरीक्षक घनश्याम श्रेष्ठले बताए ।
राईलाई वैदेशिक रोजगार न्यायाधिकरणले २०७३ साल चैत एक गते २ वर्ष ९ महिना १० दिन कैद र ३ लाख रुपैयाँ जरिवानाको फैसला गरेको प्रहरीको भनाइ छ ।
त्यस्तै, आत्महत्या दुरुत्साहन मुद्दाका फरार प्रतिवादी रहेका सुवेदी भने काठमाडौं बस्दै आएका थिए ।
उनलाई काठमाडौं महानगरपालिका–२८ बागबजगारबाट माघ ७ गते पक्राउ गरिएको जानकारी डिएसपी श्रेष्ठले दिए ।
गत मंसिर २६ गते एक युवतीले आत्महत्या गरेपछि सुवेदी फरार बनेका थिए ।
सुवेदीलाई इलाका प्रहरी कार्यालय चैनपुरको हिरासतमा राखेर घटनाको अनुसन्धान अघि बढाइएको छ ।
