विराटनगर । राष्ट्रियसभा सदस्य निर्वाचनका लागि कोशी प्रदेशबाट पाँच जनाले उम्मेदवारी दर्ता गराएका छन् ।
आगामी माघ ११ गते हुने राष्ट्रियसभामा निर्वाचनका लागि कोशीबाट अन्य र महिला समूहबाट रिक्त रहेको पदमा निर्वाचन हुँदै छ ।
गठबन्धन दलको तर्फबाट नेपाली कांग्रेसका नेता तथा पूर्वमहामन्त्री कृष्णप्रसाद सिटौला र नेकपा माओवादीका केन्द्रीय सदस्य चम्पादेवी कार्कीले मनोनयन दर्ता गराएका छन् ।
नेता सिटौलाले अन्य तर्फबाट राष्ट्रियसभा सदस्य पदमा उम्मेदवारी दिँदा भने कार्कीले महिलातर्फबाट उम्मेदवारी दिएका हुन् ।
कार्की जनयुद्धका क्रममा हात गुमाएकी घाइते लडाकु हुन् ।
सिटौलाको प्रस्तावकमा कांग्रेसका प्रदेशसभा सदस्य प्रदीप सुनुवार र समर्थकमा कांग्रेसकै प्रदेशसभा सदस्य हिमाल कार्की रहेका छन् ।
यस्तै, कार्कीको प्रस्तावकमा माओवादी केन्द्रका प्रदेशसभा सदस्य गणेशप्रसाद उप्रेती र समर्थकमा नेपाली कांग्रेसका प्रदेशसभा सदस्य रामकुमार खत्री छन् ।
राष्ट्रियसभा निर्वाचनका लागि नेकपा (एमाले)को तर्फबाट पनि दुई जनाले उम्मेदवारी दर्ता गराए ।
अन्यतर्फ पर्शुराम अधिकारी र महिला तर्फबाट रुकमणि कोइरालाले उम्मेदवारी दर्ता गराए ।
एमालेका स्थायी समिति सदस्य तथा कोशी प्रदेशका पूर्व मुख्यमन्त्री शेरधन राईसहित उपस्थितिमा दुवै जनाले उम्मेदवारी दर्ता गराए ।
अधिकारीको प्रस्तावकमा प्रदेशसभा सदस्य सिर्जना राई र समर्थकमा जयप्रकाश चौधरी रहनुभएको छ भने कोइरालाको प्रस्तावकमा रामप्रसाद मेहता र समर्थकमा शिला दीक्षित कार्की छन् ।
राष्ट्रिय प्रजातन्त्र पार्टी (राप्रपा) ले अन्य समूहबाट उद्धव पौडेललाई उम्मेदवार बनाएको छ । पौडेलको प्रस्तावक भक्तिप्रसाद सिटौला र समर्थकमा रवीन्द्रप्रसाद लिङ्देन रहेको निर्वाचन अधिकृत हेमबहादुर बुढाथोकीले जानकारी दिए ।
