ताप्लेजुङ । बालकैमा हराएका धनबहादुर लिम्बु ४५ वर्षपछि घर फर्किएपछि परिवारमा खुसी छाएको छ ।
घर परिवारसँग सम्पर्कविहीन रहेर बेपत्ता बनेका ताप्लेजुङको श्रीजङ्गा गाउँपालिका–३ घर भएका ६० वर्षीय लिम्बू घर फर्किएका हुन् ।
१५ वर्षको उमेरदेखि नै हराएका उनी हालैमात्र आफन्तको सम्पर्कमा आएका हुन् । उनी बेपत्ता रहँदा खोजीका लागि परिवार वर्षौंदेखि भौंतारिँदै आएको थियो ।
उनी भारतमा बेवारिसे अवस्थामा फेला परेका थिए । स्थानीय एक संस्थाले उद्धार गरेर उनलाई नेपाल पठाइदिएको हो ।
झापा प्रहरीका अनुसार भारत सिक्किमको अन्तर्राष्ट्रिय मानव परिषद् संस्थाको पहलमा उनलाई भारतबाट नेपाल ल्याइएको छ ।
उक्त संस्थाले उक्त व्यक्तिको पहिचानका लागि झापा प्रहरीसँग समन्वय गरेको थियो ।
करिब दुई महिनाअघि बेवारिसे अवस्थामा फेला पारी पुनर्स्थापना केन्द्रमा राखेको जानकारी आफूहरूले पाएको र ल्याउन प्रयास गरेको झापाका प्रहरी प्रवक्ता खगेन्द्र रिजालले बताएका छन् ।
सो सस्थासँग समन्वय गर्दा संस्थाको प्रतिनिधिहरूले शनिवबार लिम्बूलाई इलाका प्रहरी कार्यालय काँकरभिट्टामा ल्याइदिएको हो ।
उनको भतिज नाता पर्ने श्रीजङ्गा-३ का ४३ वर्षीय आइतराज लिम्बू व्यक्ति आएर उनलाई बुझेर लगेको प्रहरीले जनाएको छ ।
