नेपाल राष्ट्र बैंकले आफ्नै भर्चुअल मुद्रा (डिजिटल करेन्सी) ल्याउन अध्ययन सुरु गरेको छ ।
राष्ट्र बैंकले पछिल्लो समय क्रिप्टो करेन्सी जस्ता मुद्रालाई अवैध कारोबार भन्दै कारबाही गरिरहेको छ ।
तर अहिले राष्ट्र बैंक आफ्नै करेन्सी ल्याउन समिति नै बनाएर लागि परेकाे छ ।
यसका लागि बैंकले आवश्यक छलफल सुरु गरिसकेकाे छ ।
डिजिटल करेन्सी ल्याउन प्रारम्भिक चरणको अध्ययन सुरु गरिएको नेपाल राष्ट्र बैंकका प्रवक्ता डा. गुणाकर भट्ट बताउँछन् ।
राष्ट्र बैंकको मुद्रा व्यवस्थापन विभागका निर्देशकको संयोजकत्वमा समिति गठन गरी अध्ययनको जिम्मा दिइएको छ ।
अध्यनका लागि एक महिनाको समय पाएको समितिले अध्ययन प्रतिवेदन बुझाएपछि थप प्रक्रिया अघि बढ्ने प्रवक्ता भट्टले बताए ।
छिमेकी मुलुक भारतले चालु आर्थिक वर्षको बजेटमा समावेश नै गरेर आफ्नै डिजिटल करेन्सी ल्याउने घोषणा गरिसकेको छ ।
हाल धेरै मुलुकहरूमा डिजिटल मुद्राको कारोबार हुने गरेको छ ।
नेपालमा भने बिट क्वाइन, क्रिप्टोकरेन्सी, हाइपरफन्ड जस्ता डिजिटल करेन्सीमा गरिएको लगानी गैर कानुनी मानिएका छन् ।
