‘पुष्पा’ ले बक्स अफिसमा पाएको सफलतासँगै अभिनेत्री रश्मिका मन्दनाको क्रेज बढेको छ ।
लकडाउन पश्चात सर्वाधिक कमाइ गर्न सफल ‘पुष्पा’की नायिकाले पारिश्रमिक पनि बढाएकी छिन् । चलचित्र निर्माण पक्षले केही महिनापछि सिक्वेलको छायांकन शुरु गर्ने तयारी गरिरहेकाे बेला पुष्पाकाे सिक्वेलमा पनि अल्लु अर्जुन र रश्मिका नै मुख्य भूमिकामा दाेहाेरिने निश्चित छ ।
भारतीय सञ्चारमाध्यमहरुका अनुसार सिक्वेलका लागि रश्मिकाले ५० प्रतिशत बढी पारिश्रमिक मागेकी छिन् । उनले ‘पुष्पा’को सिक्वेलका लागि ३ करोड पारिश्रमिक मागेको समाचारमा बताइएको छ ।
हुन त रश्मिका भन्दा अघि पनि चलचित्र हिट भएपछि प्रायजसो कालाकारहरुले पारिश्रमिक बढाउने गरेका छन् । यसअघि बलिउड अभिनेत्रीहरु कंगना रनावत, दीपिका पादुकोण, अभिनेता कार्तिक आर्यन, साउथ स्टार यश लगायतले पनि सिक्वेलका लागि महङ्गो पारिश्रमिक लिएका थिए ।
