पश्चिमी र स्थानीय वायुको प्रभावका कारण आज देशका विभिन्न पहाडी तथा हिमाली क्षेत्रमा वर्षा र हिमपातको सम्भावना रहेको छ। मौसम पूर्वानुमान महाशाखाका अनुसार केही स्थानमा मेघगर्जन र चट्याङसहित मध्यम वर्षा हुन सक्नेछ।
हाल देशका हिमाली तथा पहाडी भूभागमा आंशिक बदली रहेको छ भने तराईका अधिकांश स्थानमा मौसम मुख्यतया सफा छ।
महाशाखाका अनुसार दिउँसो गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली भूभागका थोरै स्थानमा वर्षा र हिमपात हुन सक्नेछ। कोशी र बागमती प्रदेशका पहाडी तथा हिमाली क्षेत्रका एक–दुई स्थानमा पनि मेघगर्जन र चट्याङसहित मध्यम वर्षा तथा हिमपातको सम्भावना छ।
त्यस्तै, लुम्बिनी र सुदूरपश्चिम प्रदेशका तराई क्षेत्रमा पनि एक–दुई स्थानमा मध्यम वर्षा हुन सक्ने अनुमान गरिएको छ। देशका अन्य तराई क्षेत्रमा भने मौसम मुख्यतया सफा रहनेछ।
आज राति हिमाली भूभागमा साधारणतया बादल लाग्ने र पहाडी क्षेत्रमा आंशिक बदली रहने महाशाखाले जनाएको छ। तराईमा मौसम मुख्यतया सफा रहने भए पनि हिमाली क्षेत्रका एक–दुई स्थानमा हल्का वर्षा तथा हिमपात हुन सक्ने पूर्वानुमान छ।
