बुढीगण्डकी नदीमा आएको बाढीले दुईवटा पक्की पुल बगाएपछि गोरखाको सडक सम्पर्क अझै सहज हुन सकेको छैन। बाढीले पुलमा क्षति पुर्याएपछि सम्बन्धित क्षेत्रमा सडक आवागमन पूर्ण रूपमा ठप्प भएको नेपाल प्रहरीले जनाएको छ।
प्रहरीका अनुसार आरुघाट गाउँपालिका–२ र ३ जोड्ने सोतीस्थित फलामे मोटरेबल पक्की पुल तथा आरुघाट गाउँपालिका–९ बाट धादिङ जोड्ने अर्को पक्की पुल बाढीले बगाएको हो। बुधबार बिहानसम्म अवरुद्ध सडक सञ्चालनमा आउन सकेको छैन।
गत आइतबार बिहान चुमनुब्री गाउँपालिका–६ अन्तर्गत लोक्पा र चुम्लिङबीचको सिरिङ्गे हिमालमा हिमपहिरो गएको थियो। हिमपहिरोपछि उइनगुलुङ खोला थुनिँदा बुढीगण्डकी नदीमा बाढी आएको थियो।
अचानक आएको बाढीले नदीमाथिका दुवै पक्की पुल बगाएपछि त्यस क्षेत्रको यातायात सेवा प्रभावित भएको छ। पुलमा भएको क्षतिका कारण स्थानीय बासिन्दाको आवागमनसमेत प्रभावित बनेको छ।
