राष्ट्रिय स्वतन्त्र पार्टी (रास्वपा) का सांसद डा. अमरेशकुमार सिंहले नेपाली कांग्रेसको नेतृत्व चयन प्रक्रियामा समावेशिताको अवस्था कमजोर रहेको भन्दै आलोचना गरेका छन्। समावेशी लोकतन्त्रको पक्षमा आवाज उठाउने कांग्रेसले आफ्नै नेतृत्व चयनमा सबै समुदाय र प्रदेशलाई उचित स्थान दिन नसकेको उनको आरोप छ।
सामाजिक सञ्जालमार्फत आफ्नो धारणा सार्वजनिक गर्दै सिंहले कांग्रेसको सभापतिदेखि महामन्त्रीसम्मका पदमा खस–आर्य समुदायको वर्चस्व देखिएको टिप्पणी गरेका छन्। उनले दलित, मधेसी, थारू, मुस्लिम, आदिवासी जनजाति तथा अन्य सीमान्तकृत समुदायको प्रतिनिधित्वबारे प्रश्न उठाएका छन्।
उनले नेतृत्वमा जनजाति र दलित समुदायको प्रतिनिधित्व नदेखिएको तथा प्रादेशिक हिसाबले मधेश, सुदूरपश्चिम र कर्णालीको उपस्थिति कमजोर रहेको भन्दै कटाक्ष गरेका छन्। समावेशिताको नारा र नेतृत्वको वास्तविक संरचनाबीच तालमेल हुनुपर्ने उनको भनाइ छ।
सिंहले समावेशिता भाषणमा मात्र सीमित नभई नेतृत्वको संरचनामै प्रतिबिम्बित हुनुपर्नेमा जोड दिएका छन्। महिला प्रतिनिधित्वलाई पनि एउटै समुदायमा सीमित गरेर वास्तविक समावेशिताको दाबी गर्न नसकिने उनको टिप्पणी छ।
ऐतिहासिक लोकतान्त्रिक पार्टीका रूपमा कांग्रेसले सबै समुदायलाई समान अवसर र सम्मान दिन सक्नुपर्ने उल्लेख गर्दै उनले नेतृत्व चयनमा समावेशी अभ्यास आवश्यक रहेको बताएका छन्।
नाम र नारा परिवर्तन हुँदैमा नेतृत्वको चरित्र र प्रतिनिधित्वमा परिवर्तन नआए जनताले अपेक्षा गरेको राजनीतिक परिवर्तन हासिल नहुने भन्दै सिंहले कांग्रेसको नेतृत्व चयन प्रक्रियामाथि प्रश्न उठाएका छन्।
