काठमाडौं । बूढीगण्डकी नदीमा आएको बाढीपछि पहिरोको जोखिममा परेका ६ जनाको हवाई उद्धार गरिएको छ। प्रधानमन्त्री बालेन शाहले आइतबार बिहान सामाजिक सञ्जाल फेसबुकमार्फत नेपाली सेनाले जोखिम क्षेत्रबाट ६ जनाको उद्धार गरेको जानकारी दिएका हुन्।
प्रधानमन्त्री शाहका अनुसार बूढीगण्डकी नदीमा बाढी आएपछि खोज तथा उद्धारका लागि नेपाली सेनाको टोली हवाई तथा स्थलमार्गबाट परिचालन गरिएको छ। सेनाले पहिरोको जोखिममा रहेको गोरखाको जगत् क्षेत्रबाट ६ जनालाई हवाई उद्धार गरेको उनले बताएका छन्।
प्रधानमन्त्री शाहले सामाजिक सञ्जालमा लेखेका छन्, ‘बूढीगण्डकी नदीमा आएको बाढीपश्चात् खोज तथा उद्धार कार्यका लागि नेपाली सेनाको फौज हवाई तथा स्थल मार्गबाट खटिई पहिरोको जोखिममा रहेको जगत इलाकाबाट ६ जनाको हवाई उद्धार गरिएको छ। काठमाडौंमा रहेको कम्पोजिट क्विक रियाक्सन टिमसमेत हवाई साधनबाट उक्त इलाकामा तैनाथ भएको छ।’
उनका अनुसार बाढी प्रभावित क्षेत्रमा उद्धार, राहत तथा जोखिममा रहेका नागरिकलाई सुरक्षित स्थानमा स्थानान्तरण गर्न हेलिकोप्टर परिचालन गरिएको छ। बाढी र पहिरोको जोखिम कायम रहेकाले प्रभावित क्षेत्रका बासिन्दाको सुरक्षा तथा उद्धारलाई प्राथमिकता दिइएको छ।
