काठमाडौं । मेडिकल व्यवसायी तथा राजनीतिक अभियन्ता दुर्गा प्रसाईं फेरि पक्राउ परेका छन् । नेपाल प्रहरीको साइबर ब्युरोको टोलीले सोमबार बिहान भक्तपुरस्थित आफ्नै निवासबाट प्रसाईंलाई नियन्त्रणमा लिएको हो ।
प्रहरीका अनुसार राष्ट्रिय स्वतन्त्र पार्टी (रास्वपा) की सांसद रचना खतिवडाले दिएको उजुरीका आधारमा प्रसाईंलाई पक्राउ गरिएको हो । खतिवडा जेनजी आन्दोलनका क्रममा मृत्यु भएका रसिक खतिवडाकी आमासमेत हुन् ।
प्रसाईंले सामाजिक सञ्जालमार्फत सांसद खतिवडा र उनका दिवंगत छोरालाई जोडेर अपमानजनक तथा आपत्तिजनक अभिव्यक्ति दिएको आरोप छ । प्रसाईंले खतिवडाले ‘छोराको लाससँग सांसद पद साटेको’ तथा ‘छोराको लाशमा टेकेर संसद् बनेको’ लगायतका अभिव्यक्ति दिएको आरोप उजुरीमा उल्लेख गरिएको बताइएको छ ।
प्रसाईंको उक्त अभिव्यक्तिप्रति सांसद खतिवडाले प्रतिनिधि सभाको बैठकमै कडा आपत्ति जनाएकी थिइन् । संसदमा बोल्ने क्रममा उनले आफू र आफ्नो परिवारमाथि गरिएको टिप्पणीप्रति आपत्ति जनाउँदै भावुक भएकी थिइन् ।
सामाजिक सञ्जालमार्फत आफू र आफ्नो परिवारलाई अपमानित गर्ने तथा दिवंगत छोराको समेत नाम जोडेर आपत्तिजनक टिप्पणी गरिएको भन्दै खतिवडा परिवारले साइबर ब्युरोमा उजुरी दिएका थिए ।
सोही उजुरीका आधारमा प्रसाईंलाई अनुसन्धानका लागि नियन्त्रणमा लिइएको साइबर ब्युरोले जनाएको छ । अब प्रहरीले प्रसाईंले सामाजिक सञ्जालमा गरेको भनिएको अभिव्यक्ति, त्यसको स्रोत तथा कानुनी कसुरका विषयमा अनुसन्धान गर्नेछ ।
दुर्गा प्रसाईं यसअघि पनि विभिन्न मुद्दा तथा उजुरीका कारण पटक–पटक प्रहरी नियन्त्रणमा परिसकेका छन् । उनका विरुद्ध साइबर अपराधदेखि बैंकिङ कसुर तथा सार्वजनिक अशान्तिसँग सम्बन्धित विभिन्न विषयमा अनुसन्धान र कानुनी प्रक्रिया अघि बढेको देखिन्छ ।
यसपटक भने सांसद रचना खतिवडाको उजुरीपछि सामाजिक सञ्जालमा गरिएको भनिएको आपत्तिजनक अभिव्यक्तिलाई आधार बनाएर साइबर ब्युरोले उनलाई नियन्त्रणमा लिएको हो ।
