काठमाडौं । अविरल वर्षापछि आएको बाढी र पहिरोका कारण बीपी राजमार्ग अवरुद्ध भएपछि काठमाडौं हुँदै पूर्वतर्फ जाने सबै सवारीसाधनलाई धुलिखेल चोकमा ‘होल्ड’ गरिएको छ।
वर्षाका कारण राजमार्गका विभिन्न स्थानमा पहिरो र लेदो खस्नुका साथै रोशी खोलाले सडक कटान गरेपछि बीपी राजमार्ग पूर्णरूपमा अवरुद्ध भएको हो।
जिल्ला प्रहरी कार्यालय काभ्रेका प्रमुख एसपी रविन कार्कीका अनुसार नमोबुद्ध नगरपालिका–६ को चौकीडाँडा, रोशी गाउँपालिका–७ को चारसयवेशी, वडा नम्बर ८ को गिम्दीवेशी र वडा नम्बर ११ को माम्तीमा पहिरो खसेको छ। चौकीडाँडामा रोशी खोलाले सडकको डाइभर्सनसमेत कटान गरेको प्रहरीले जनाएको छ।
राजमार्ग अवरुद्ध भएपछि काठमाडौं, धुलिखेल हुँदै पूर्वतर्फ जाने सवारीसाधनलाई धुलिखेल चोकमै रोकिएको छ। काभ्रेभञ्ज्याङ र भकुण्डे क्षेत्रमा समेत सवारीसाधन होल्ड गरिएको प्रहरीले जनाएको छ।
अहिले पनि वर्षा भइरहेकाले पहिरो हटाएर सडक सञ्चालनमा ल्याउन समय लाग्न सक्ने प्रहरीले जनाएको छ। यात्रु तथा सवारी चालकलाई सडकको अवस्थाबारे जानकारी लिएर मात्र यात्रा गर्न प्रहरीले अनुरोध गरेको छ।
