विराटनगर । आगामी पाँच दिनसम्म देशका प्रमुख नदी तथा सहायक नदीहरूमा जलसतह उल्लेख्य रूपमा बढ्ने पूर्वानुमान गरिएको छ। जल तथा ऊर्जा आयोगको सचिवालयअन्तर्गत जल विज्ञान तथा जलस्रोत अनुसन्धान केन्द्रको बाढी पूर्वानुमान महाशाखाले नदी तथा खोलामा बहाव बढ्ने भन्दै तटीय र जोखिमयुक्त क्षेत्रमा बसोबास गर्ने नागरिकलाई उच्च सतर्कता अपनाउन आग्रह गरेको हो।
महाशाखाका बाढीविद् सौहार्द जोशीका अनुसार कोशी, नारायणी, कर्णाली, महाकालीसहित कन्काई, कमला, बागमती, पूर्वी राप्ती, पश्चिम राप्ती, बबईलगायत नदीमा आगामी पाँच दिन जलसतह बढ्ने सम्भावना छ।
विशेषगरी कोशी नदी प्रणालीअन्तर्गत सप्तकोशी, तमोर, अरुण, दूधकोशी, तामाकोशी र सुनकोशीलगायत नदीमा जलसतह बढ्ने अनुमान गरिएको छ। त्यस्तै, नारायणी नदी प्रणालीअन्तर्गत नारायणी, त्रिशूली, बूढीगण्डकी, मर्स्याङ्दी, सेती र कालीगण्डकीमा पनि बहाव बढ्ने पूर्वानुमान छ।
कर्णाली क्षेत्रमा कर्णाली, भेरी, तिला र पश्चिम सेती नदीमा पनि जलसतह बढ्न सक्नेछ। महाकाली, कन्काई, कमला, बागमती, पूर्वी राप्ती, तिनाउ, बाणगङ्गा, पश्चिम राप्ती र बबई नदीमा समेत बहाव बढ्ने सम्भावना रहेको महाशाखाले जनाएको छ।
साना नदी र खोलामा आकस्मिक बाढीको जोखिम
ठूला नदीसँगै देशका विभिन्न जिल्लाका साना नदी, खोला तथा जलाधारमा पनि बहाव उल्लेख्य बढ्न सक्ने अनुमान गरिएको छ। केही स्थानमा पानीको बहाव अचानक बढेर आकस्मिक बाढी आउन सक्ने जोखिमसमेत रहेको महाशाखाले जनाएको छ।
आज विशेषगरी ताप्लेजुङदेखि कञ्चनपुरसम्मका विभिन्न जिल्लाका साना नदी तथा खोलामा बहाव बढ्ने सम्भावना छ। कोशी प्रदेशका ताप्लेजुङ, पाँचथर, इलाम, झापा, मोरङ, सुनसरी, तेह्रथुम, धनकुटा, सङ्खुवासभा, भोजपुर, खोटाङ र उदयपुरलगायत जिल्लामा सतर्कता आवश्यक देखिएको छ।
मधेस तथा बागमतीका सिरहा, धनुषा, महोत्तरी, सर्लाही, सिन्धुली, ओखलढुङ्गा, दोलखा, रामेछाप, सिन्धुपाल्चोक, काभ्रेपलाञ्चोक, काठमाडौं, भक्तपुर, ललितपुर, मकवानपुर, रौतहट, बारा र पर्सालगायत जिल्लामा पनि साना नदी तथा खोलामा बहाव बढ्न सक्ने जनाइएको छ।
यस्तै, रसुवा, नुवाकोट, धादिङ, गोरखा, चितवन, नवलपरासी पूर्व–पश्चिम, रुपन्देही, तनहुँ, कास्की, लमजुङ, स्याङ्जा, मनाङ, मुस्ताङ, म्याग्दी, बागलुङ र पर्वतलगायत जिल्लामा पनि जोखिम रहेको छ।
कर्णाली तथा सुदूरपश्चिमका रुकुम पूर्व–पश्चिम, रोल्पा, सल्यान, बाँके, बर्दिया, सुर्खेत, दैलेख, जाजरकोट, जुम्ला, कालीकोट, अछाम, डोटी, डडेलधुरा, बैतडी, दार्चुला र कञ्चनपुरसम्मका जिल्लाका साना नदी तथा खोलामा समेत बहाव बढ्ने सम्भावना रहेको छ।
तटीय क्षेत्रमा विशेष सावधानी अपनाउन आग्रह
बाढी पूर्वानुमान महाशाखाले नदी तथा खोलाको तटीय क्षेत्रमा बसोबास गर्ने नागरिकलाई विशेष सावधानी अपनाउन आग्रह गरेको छ। नदी किनार, खोला आसपास तथा पहिरो र बाढीको जोखिम भएका स्थानमा अनावश्यक रूपमा नजान र बालबालिका तथा ज्येष्ठ नागरिकलाई सुरक्षित राख्न आग्रह गरिएको छ।
अचानक पानीको बहाव बढ्न सक्ने भएकाले खोला तथा नदी तर्नुपर्ने अवस्था आएमा विशेष सावधानी अपनाउनुपर्नेछ। लगातार वर्षा भइरहेका बेला साना खोलामा समेत एक्कासि ठूलो बाढी आउन सक्ने भएकाले जोखिमलाई सामान्य रूपमा नलिन महाशाखाले आग्रह गरेको छ।
आगामी पाँच दिनसम्म नदीको जलसतह बढ्ने पूर्वानुमान रहेकाले स्थानीय तह, सुरक्षा निकाय र सम्बन्धित निकायलाई पनि आवश्यक तयारी र निगरानी बढाउनुपर्ने अवस्था देखिएको छ।
महाशाखाका बाढीविद् सौहार्द जोशीले नदी तथा खोलाको तटीय क्षेत्र र जोखिमयुक्त स्थानमा बसोबास गर्ने नागरिकलाई मौसम र बाढीसम्बन्धी सूचना निरन्तर हेर्न तथा सम्भावित जोखिमबाट जोगिन उच्च सतर्कता अपनाउन आग्रह गरेका छन्।
