काठमाडौं । रसुवाको भोटेकोशी नदीमा आएको बाढीपछि बेपत्ता भएका नागरिक तथा फेला परेका शव र मानव अंगको पहिचानका लागि नेपाल प्रहरीले डीएनए परीक्षण प्रक्रिया अघि बढाएको छ।
नेपाल प्रहरीले सूचना जारी गर्दै बेपत्ता नागरिकका नजिकका रगतका नातेदारलाई डीएनए परीक्षणका लागि नमुना उपलब्ध गराउन आग्रह गरेको हो।
प्रहरीका अनुसार स्वदेश तथा विदेशमा रहेका बेपत्ता नागरिकका पहिलो पुस्ताका नातेदारले डीएनए परीक्षणको प्रक्रिया पूरा गर्नुपर्नेछ। स्वदेशमा रहेका आफन्तमध्ये बाबु, आमा, छोरा वा छोरीमध्ये कुनै एक जनाले दुई प्रति पासपोर्ट साइजको फोटोसहित उपस्थित भएर ताजा रगतको नमुना दिनुपर्नेछ।
यसका लागि नेपाल प्रहरी अस्पताल महाराजगञ्जको प्याथोलोजी ल्याब वा नजिकको जिल्ला प्रहरी कार्यालयमा सम्पर्क गर्न प्रहरीले आग्रह गरेको छ।
विदेशमा रहेका परिवारले के गर्ने ?
विदेशमा रहेका विदेशी वा गैरआवासीय नेपालीका हकमा पनि बाबु, आमा, छोरा वा छोरीमध्ये कुनै एक जनाले सम्बन्धित देशकै आधिकारिक फोरेन्सिक प्रयोगशालाबाट ‘अटोसोमल एसटीआर डीएनए प्रोफाइलिङ’ गराउनुपर्नेछ।
उक्त डीएनए प्रोफाइलको सफ्टकपी अर्थात् डिजिटल प्रति नेपाल प्रहरीको आधिकारिक इमेलमा पठाउन प्रहरीले आग्रह गरेको छ। इमेलमा सम्बन्धित व्यक्तिको पूरा नाम र राष्ट्रियता, राहदानी वा आधिकारिक परिचयपत्रको विवरण, व्यक्ति हराएको मिति तथा सम्भावित स्थान समावेश गर्नुपर्नेछ।
त्यसैगरी, मान्यताप्राप्त प्रयोगशालाबाट प्राप्त डीएनए प्रोफाइलिङ रिपोर्ट र डीएनए नमुना दिने व्यक्ति तथा हराइरहेको व्यक्तिबीचको पारिवारिक नाता समेत खुलाउनुपर्ने प्रहरीले जनाएको छ।
डीएनए परीक्षण तथा आवश्यक समन्वयका लागि नेपाल प्रहरीले दुई जना सम्पर्क अधिकारी तोकेको छ। प्रहरी निरीक्षक शम्भुबहादुर केसीलाई ९८४१६१६०९५ र प्रहरी नायव निरीक्षक (सई) विष्णु घिमिरेलाई ९८५७०९१०१३ मा सम्पर्क गर्न सकिनेछ।
बाढीले ठूलो संख्यामा नागरिक बेपत्ता भएको र कतिपय शव क्षतविक्षत अवस्थामा फेला परिरहेकाले वैज्ञानिक विधिबाट पहिचान गरी परिवारलाई बुझाउन डीएनए परीक्षणको प्रक्रिया अघि बढाइएको प्रहरीले जनाएको छ।
