विराटनगर । सुनसरीको दुहबीमा यस वर्षको श्रीकृष्ण जन्माष्टमी महोत्सवलाई लक्षित गर्दै सुरक्षा तथा यातायात व्यवस्थापनलाई विशेष प्राथमिकता दिइएको छ। दुहबी–६ स्थित ऐतिहासिक श्री राधाकृष्ण मन्दिरमा भदौ १९ र २० गते आयोजना हुने दुईदिने महोत्सवमा करिब ५० हजार भक्तजन सहभागी हुने आयोजकको अपेक्षा छ।
महोत्सवको मुख्य आकर्षणका रूपमा भव्य रथयात्रा आयोजना गरिँदैछ। रथयात्रामा दुहबीसहित आसपासका विभिन्न पालिकाबाट ठूलो संख्यामा भक्तजन सहभागी हुने भएकाले मन्दिर परिसरदेखि रथयात्रा मार्गसम्म सुरक्षा व्यवस्था कडा बनाइने भएको हो।
महोत्सवलाई व्यवस्थित बनाउन मूल आयोजक समितिअन्तर्गत १६ वटा उपसमिति गठन गरिएको छ। ती समितिले मञ्च तथा सांस्कृतिक कार्यक्रम, प्रसाद वितरण, सुरक्षा, स्वयंसेवक परिचालन, झाँकी, प्रचारप्रसार, आर्थिक व्यवस्थापन र अतिथि सत्कारलगायतका जिम्मेवारी सम्हाल्नेछन्।
मन्दिर व्यवस्थापन समितिका अध्यक्ष रमेश रौनियारका अनुसार महोत्सवलाई सुरक्षित र व्यवस्थित बनाउन स्थानीय प्रशासन, नेपाल प्रहरी तथा सशस्त्र प्रहरीसँग समन्वय गरिएको छ। रथयात्राका क्रममा सादा पोसाकका सुरक्षाकर्मी परिचालन गर्नुका साथै मन्दिर तथा यात्रा मार्गमा निगरानी क्यामेरामार्फत समेत निगरानी गरिनेछ।
रथयात्राका कारण मुख्य राजमार्गमा सवारी आवागमन प्रभावित हुन सक्ने भएकाले सवारी चाप व्यवस्थापनका लागि वैकल्पिक मार्गको व्यवस्था गरिने आयोजकले जनाएको छ।
धार्मिक आस्था र सांस्कृतिक महत्व बोकेको जन्माष्टमी महोत्सवमा रथयात्रासँगै विभिन्न झाँकी तथा सांस्कृतिक प्रस्तुति आयोजना गरिनेछ। आयोजकले भक्तजनलाई महोत्सवमा सहभागी भई भगवान् श्रीकृष्णको दर्शन तथा महाप्रसाद ग्रहण गर्न आह्वान गरेको छ।
