विराटनगर । रसुवामा आएको भीषण बाढीबाट प्रभावित नागरिकको उद्धार तथा राहत कार्यमा सहयोग पुर्याउने उद्देश्यले बुद्धोदय बचत तथा ऋण सहकारी संस्था लिमिटेडले प्रधानमन्त्री दैवी प्रकोप उद्धार कोषमा रु. १ लाख १ हजार सहयोग गरेको छ।
संस्थाका अध्यक्ष राजेन्द्र प्रसाद खनालले विपद्को यस कठिन समयमा सबैले आ–आफ्नो क्षमताअनुसार सहयोग गर्नुपर्नेमा जोड दिँदै प्रभावित नागरिकको उद्धार तथा राहतका लागि सहयोग गर्न सबैलाई अनुरोध गरे।
त्यस्तै, संस्थाका सचिव सन्तोष बरालले विपद्को समयमा सबै मिलेर सकेको सहयोग गर्नुपर्ने बताए। उनले विपत्तिमा परेका नागरिकलाई सहयोग गर्नु सबैको सामाजिक दायित्व भएको उल्लेख गर्दै राहत तथा उद्धार कार्यमा हातेमालो गर्न आग्रह गरे।
सहकारीले आफ्नो सामाजिक उत्तरदायित्वअन्तर्गत उक्त रकम प्रधानमन्त्री दैवी प्रकोप उद्धार कोषको नबिल बैंकको खाता नं. १७१००१७५०५२८५ मा रकम जम्मा गरिएको संस्थाका कोषाध्यक्ष यज्ञ प्रसाद खतिवडाले जानकारी दिए। संस्थाले रसुवाको बाढीबाट ज्यान गुमाएका तथा प्रभावित परिवारप्रति समवेदना व्यक्त गर्दै उद्धार तथा राहत कार्यमा निरन्तर साथ रहने प्रतिबद्धता जनाएको छ।
