काठमाडौं । सत्तारूढ दल राष्ट्रिय स्वतन्त्र पार्टी (रास्वपा) का सांसद तथा राज्य व्यवस्था तथा सुशासन समितिका सभापति हरि ढकालले सिंहदरबारको नाम परिवर्तन गर्नुपर्ने बताएका छन्।
आइतबार आयोजित एक कार्यक्रममा बोल्दै ढकालले नेपालमा सिंह नै नभएकाले ‘सिंहदरबार’ नाम उपयुक्त नभएको तर्क गर्दै यसको नाम ‘अनामनगर दरबार’ राख्न सुझाव दिएका हुन्।
राजनीतिक परिवर्तनपछि विभिन्न स्थान तथा संस्थाका नाम परिवर्तन गरिए पनि सिंहदरबारको नाम भने परिवर्तन नगरिएको भन्दै उनले नामसँगै त्यससँग जोडिएको पुरानो सत्ता संस्कार र मानसिकता पनि परिवर्तन गर्नुपर्ने धारणा राखे।
उनले भने, “परिवर्तनपछि दुनियाँ ठाउँको नाम परिवर्तन गर्दैगर्दा त्यसलाई ‘अनामनगर दरबार’ राख्दिएको भए हुन्थ्यो होला। हामीसँग सिंह नै छैन, त्यसको नाम चाहिँ सिंहदरबार नै छ। र त्यसको केही हाउभाउ, भावभङ्गीहरू, त्यो भाषा जस्तै छ। त्यो चिर्नुपर्ने छ।”
ढकालले मुलुकको वर्तमान अवस्था र सुशासनबारे धारणा राख्दै देश एकैपटक समृद्ध बन्न नसक्ने बताए। सुशासन पनि रातारात स्थापित नहुने भन्दै उनले त्यसका लागि निरन्तर सुधार र प्रयास आवश्यक रहेको बताएका छन्।
