कपिलवस्तु । कपिलवस्तु नगरपालिकाका पूर्वमेयर तथा नेपाली कांग्रेसका नेता किरण सिंह मृत अवस्थामा भेटिएका छन्। गत शुक्रबारदेखि सम्पर्कविहीन रहेका ६५ वर्षीय सिंहको शव आइतबार प्रहरीले खोजी गर्ने क्रममा फेला पारेको हो।
प्रहरीका अनुसार शुक्रबार दिउँसो करिब २ बजे कपिलवस्तु–३ स्थित आफ्नै घरबाट मोटरसाइकल लिएर निस्किएका सिंह त्यसपछि परिवार तथा आफन्तको सम्पर्कमा थिएनन्। उनी हराएपछि आफन्त र प्रहरीको टोलीले खोजी सुरु गरेको थियो।
खोजीका क्रममा शनिबार पूर्व–पश्चिम राजमार्गबाट करिब आठ किलोमिटर भित्र जंगल क्षेत्रमा सिंहले प्रयोग गर्ने लु.प्र. ०१–०१३ प ७९७० नम्बरको मोटरसाइकल रोकिराखेको अवस्थामा फेला परेको थियो। मोटरसाइकल भेटिए पनि सिंहको अवस्था भने तत्काल पत्ता लाग्न सकेको थिएन।
प्रहरीका अनुसार शुक्रबार दिउँसो करिब ३ बजेर २७ मिनेटमा चेतदराईस्थित सनसाइन सामाजिक विकास केन्द्रको सीसीटीभी फुटेजमा सिंह रामराज पुलतर्फ गएको देखिएको थियो। त्यसको केही समयपछि उनले आफू निकटका व्यक्तिलाई मोबाइलमार्फत जंगलमा बाटो बिराएको जानकारी गराएका थिए।
त्यसपछि आफन्तसहित प्रहरीको टोलीले सम्भावित स्थानमा खोजी तीव्र पारेको थियो। खोजी गर्ने क्रममा आइतबार मोटरसाइकल भेटिएको स्थान नजिकै करिव १२ बजेतिर सिंहको शव फेला परेको जिल्ला प्रहरी कार्यालय कपिलवस्तुका सूचना अधिकारी रिपेन्द्र कुमार सिंहले शब्द एक्सप्रेसलाई बताएका छन् ।
सिंहको मृत्युको कारण भने तत्काल खुल्न सकेको छैन। प्रहरीले घटनाबारे थप अनुसन्धान गरिरहेको जनाएको छ।
