विराटनगर । भारतमा मल किन्न गएका बेला पक्राउ परेका सर्लाहीका दुई नेपाली किसानलाई भारतीय अदालतले धरौटीमा रिहा गर्न आदेश दिएको छ।
सर्लाहीको बलरा नगरपालिका–५ निवासी सुरेशप्रसाद सिंह र नागेन्द्रप्रसाद सिंह लाई सीतामढी जिल्लाको डुम्रा व्यवहार अदालतका सह–विशेष न्यायाधीश अखलेश कुमार झाको एकल इजलासले धरौटीमा रिहा गर्न आदेश दिएको हो।
किसानहरूको तर्फबाट अधिवक्ता संजयकुमार झा र किरण चौधरीले बहस गरेका थिए।
दुवै किसानलाई गत १७ असारमा भारतको सीतामढी जिल्लास्थित सोनबर्षा क्षेत्रमा डिएपी र युरिया मल लिएर नेपाल फर्किंदै गर्दा भारतीय सीमा सुरक्षा बलले पक्राउ गरेको थियो।
त्यसपछि १८ असार मा उनीहरूलाई जेल चलान गरिएको थियो।
