विराटनगर । पश्चिम नवलपरासीको सुस्तामा स्थानीयवासी र भारतीय सशस्त्र सीमा बल (एसएसबी)बिच हुने भनिएको छलफल स्थगित भएको छ ।
एसएसबीका एक जवानलाई सर्पले डसेपछि उपचारका लागि खटिनुपरेको भन्दै भारतीय पक्षले छलफल स्थगित गरेको हो ।
आइतबार दिउँसो अस्थायी बाँध निर्माणको विषयलाई लिएर उत्पन्न तनाव अहिले साम्य भए पनि सोही विषयमा छलफल गर्ने सहमति भएको थियो ।
भारतीय पक्षले आइतबार आफूहरूले चिनो लगाएको स्थानसम्म अस्थायी बाँध निर्माण गर्न मौखिक सहमति दिएको छ ।
यसअघि आइतबार भारतीय सशस्त्र सीमा बल नेपाली भूमिमा प्रवेश गरी निर्माणाधीन अस्थायी बाँध भत्काएको आरोप लागेपछि सुस्ता क्षेत्रमा तनाव उत्पन्न भएको थियो ।
